New Delhi, Naiwieng 17 (UNI)
Namar ka jingnang kiew ki jingjia bad jingkulmar ha Manipur, u Myntri ka tnad kam pohïing ka Sorkar Pdeng, u Amit Shah ha ka Sngi U Blei u la khmih bniah ïa ka jinglong-jingman ka shong suk shong shngaiñ hapoh ka Jylla ha ka jingïalang ‘High-Level’ ha ryngkat ka jingdonlang ki heh ophisar ba khmih ïa ka suk ka saiñ.
Ki tyllong khubor kiba don jingïadei bad ki bor treikam ka Sorkar Pdeng ba khmih ïa ka jingïada bad jingshong shngaiñ ki la ong ba u Myntri ka tnad kam pohïing u la mih na ka prokram ïalap ilekshon ha Maharashtra bad wan sha nongbah ka ri ha ka por mynsngi bad khmih bniah ïa ka jinglong-jingman ha Manipur ha ka jingïalang bad ki heh ophisar ba khmih ïa ka suk ka saiñ ha North Block.
Ki tyllong khubor ki ïathuh ba u Shah un sa ïakren ruh bad ki heh ophisar ha ka Lah Sngi U Blei halor ki sienjam ban wanrah biang ïa ka jingsuk kumjuh ïa ka jinglong-jingman kumba ju long ha ki por ba la leit.
Kum ban shu kdew hangne ba hadien ki jingkulmar ba dang shen ha Manipur, la pynjari korphiw ha bun tylli ki distrik bad la khang ruh ïa ka ‘internet’ ha katto-katne ki jaka.
Shuh shuh u paidbhur hapdeng ka jingbitar u la pynjulor ïa ki ïingsah jong katto-katne ki MLA bad Myntri hapoh ka Jylla.
Ha ka Sngi Saitjaiñ, ka tnad kam pohïing ka Sorkar Pdeng ka la bthah ïa baroh ki kynhun pahara ba kin shim ïa ki sienjam ban wanrah biang ïa ka shongsuk shongsaiñ bad ban leh da kaba tyngeh ïa kino-kino kiba pynkulmar.
Ïa ki mukotduma ba heh la aiti sha ka NIA ban leh ïa ka jingtohkit.
La kyntu ruh ïa ki paidbah ban long kiba jai-jai, ba kin ym sngap ïa ki khana thok bad ban ïatreilang bad ki kynhun pahara ban wanrah ïa ka shongsuk shongsaiñ bad ka jingbud ïa ka aiñ ha ka Jylla.
