Shillong, Naiwieng 17
Ar ngut ki briew ki bym lah ban tip ki dei kiei, ki la rung hapoh kawei ka ïing bad ban thombor da ka wait ïa ki lai ngut ki briew haduh ba ki la mynsaw jur.
Katkum ka khubor kaba la ïoh na ki pulit la ong ba kawei ka briew ka la ai ka jingujor ba ha ka miet jong ka 12 tarik mynta u bnai, ha ka por kumba 8.30 eiei, ar ngut ki briew bym lah ban ithuh ki la thombor ïa ar ngut ki pyrsa jong ka, ba la tip kyrteng kum u D Syngkon (23 snem) bad u L Syngkon (36 snem) da ka wait, hapoh ka ïing sah jong ka para jong ka kaba don ha Rymbai Road ha East Jaiñtia Hills.
Shuh shuh la ong ba kine ki runar ki la thombor ruh ïa ka para jong ka, hadien ba ka la leit ban ïaleh pyrshah ïa ki. Namar ka jingshah thombor, kine ki briew ki la mynsaw bad la pynkit noh sha Civil Hospital Khliehriat na ka bynta ban pynïoh ïa ka jingsumar.
Ha kaba ïadei bad kane, ki pulit ki dang pynlong ka jingtohkit ban lap ïa ka daw tynrai bad kumjuh ban thwet ïa kitei ki runar kiba la shah ujor.
