Ka jinglong-jingman hapoh ka jylla haba ïanujor ha ki snem 2000 shapoh bad 2000 shaneng ka la pher bak-ly-bak. Lada phai sha ka jinglong-jingman ha liang ka imlang-sahlang, ka roi ka par, ka ïoh ka kot, ka kamai- kajih jong ki nongshong shnong bad khamtam lei haba phai sha ki kam sniew ruh ki la nang ïaid lang katkum kane ka juk kaba mynta.
La ju sakhi ba ha ki snem 2000 shapoh, ka jingkhuslai mynsiem jong ki kmie ki kpa na ka bynta ki khun kam da jur than kumba long mynta. Wat la ha kito ki por ki khun ki mih na la ïing ban leit ïalehkai bad la ki paralok la ka long sha ki madan ïalehkai, surok, ne kino-kino ki jaka ruh, kum ki kmie ki kpa ki don beit hapdeng ka mynsiem kaba sngew shngaiñ bad kmen ruh ba ka jingleit ïalehkai jong ki khun ka wanrah ïa ka met kaba khiah krat.
Hynrei ha kine ki por kiba mynta pat, ka la long kaba eh shibun ban ïohi ba ki kmie ki kpa kin shah ïa la ki khun ban leit ïalehkai namar ba kam don shuh ka jingshngaiñ na ka jinglong-jingman ha ka imlang sahlang khamtam lei hadien ba u drok u la ïoh ban suhthied shaduh ki kyndong-kynshrot. Hooid ka long shisha kaba dei kum ki kmie ki kpa kin don ka jingkhuslai mynsiem namar katkum ka jinglap bad sakhi, ka jingshngaiñ kam don shuh. Haba ki khun ki mih ruh na la ïing kum ki kmie ki kpa ki don beit hapdeng ka jingrit mynsiem namar ba la jur palat ki kam sniew kiba la wan namar ka jingjyllei ki nongdih drok.
Ka jingsdang jyllei jong u drok bad ka jingbun jong ki nongdih drok, ha kaba mynta lei la ïoh ban sakhi ba wat kiba dang samla bad khynnah ruh ki la ngop ha une u jingdih ba sniew. Une jingdih ym tang ba u la wanrah ïa ki jingsniew ba har rukom hynrei ka la ktah ruh shi katdei ïa ka shongsuk-shongsaiñ ha ka imlang ka sahlang.
Ka jingkynrei jong ki nongdih drok bad ki kam sniew ka la dei kawei pat ka daw kaba la pynlong ïa kiba bun ki kmie ki kpa ban khang pyrshah ïa la ki khun ban mih leit ïalehkai shabar lait noh tang kito kiba don la ka jong ka phyllaw ïalehkai. Kane ym ba ki leh khnang, hynrei ka dei namar ba kim don shuh ïa ka jingsngew shngaiñ khamtam lei kito kiba don khun kynthei. Dei na kane ka daw ba ka jingim jong kiba bun ki khynnah ka la shu kut noh tang ha ki mobile phone naba kim don eiei shuh ban leh haba ki la pyndep ïa la ki kam ki jam ba ïadei bad ki jingpule ki jong ki.
Kumta ka long shisha kaba eh ïa ki kmie ki kpa ban shim rai, lada phah leit ïalehkai ïa ki khun shabar ruh ym suk ka mynsiem, lada phah shong khop ha ïing ruh ym hun ka mynsiem, naba kum ki khynnah ki dang donkam ban khih ban ksar.
Ka la long shisha kaba la ïapher bak-ly-bak ka jinglong khynnah ha ki snem kiba la leit bad kine ki snem kiba mynta, kawei ka dei na ka jingïaid bad kiew sted ki kor teknoloji bad kawei ka dei na ka jingjyllei jong u drok nalor kiwei pat ki daw kiba bun kiba kum ki kmie ki kpa ki ju sakhi ha kane ka juk kaba mynta.
Haba phai sha u drok, ka jingïoh rung laitlan bad jingkynrei jong ki nongdih la shem ba ka dei namar ka jingsynjor palat jong ka aiñ ban tehlakam. Kum ka nuksa lada ïoh bat ïa ki nongdih, ym lah ban kem bad set patok hynrei hap ban pyllait noh. Kumta ka long kaba donkam ban don bad pyntreikam ïa ka aiñ kaba khlaiñ ban pyrkhing bad tehlakam ïa ka jingkynrei jong u drok.
Kawei na ki daw jong ka jingkynrei jong u drok, ka dei ruh namar ba ka pisa ha kane ka kam ka heh bha. Kane ka la khring bad pynngop ïa kiba bun ki samla khamtam lei kito kiba khlem kam khlem jam. Namar kata, ka long kaba donkam ïa ka Sorkar bad ka tnat pulit ba kin phai khmat sha kane ka bynta bad kumno ban shim ki lad ki lynti ban khanglad bad pyllait ïa ki samla na kane ka jingsniew kaba shyrkhei haduh katta-katta kaba ka imlang-sahlang ruh ka la shah ktah lang shi kat dei.
