Nongstoiñ, Naiwieng 13
Kumba 278 ngut ki samla pule kiba la pass bha ha ki kyrdan bapher-bapher lem bad ki samla donsap jong ka Mawshynrut Konstitwensi ki la shah pynkup burom lyngba ka MLA Academic Excel-lence Award ha ka sngi Thohdieng ha ka jingïa-lang kaba la pynlong da u MLA ka Mawshynrut Bah Methodius Dkhar.
Ïa ka jingïalang pynkup burom ïa ki samla pule kaba la long hapoh ka Hall jong ka skul Christ King ha Riangdo ka dei kaba la pruid dak hi da u MLA ka thaiñ Bah Methodius Dkhar kum shi bynta ban ai jingithuh ïa ka jingtrei shitom jong ki bad ban ai mynsiem ruh na ka bynta ka lawei kaba phyrnai jong ki khun samla ka dong ka thaiñ Mawshynrut.
Ki 278 ki samla pule kiba la pass bha kiba la shah pynkup burom ki kynthup na ka SSLC, HSSLC, Bachelor Degree, Post Graduate bad kynthup ïa kiwei-kiwei kiba la ïoh ruh ban pdiang ïa ki khusnam bad ïa ki song pisa.
Ha katei ka sngi nalor u Bah Methodius Dkhar uba dei ruh u Myntri Sorkar, la donlang ka Hema Nayak DC, WKHD, Bah H.P Kharkongor, SP ka WKHD, Bah R Kharkongor BDO ka Mawshynrut, Bah S. Rashir MDC ka Mawshynrut, Bah L. Pohsna SDO Mawshynrut, ki samla pule ki kmie kpa bad kiwei-kiwei kiba la shah khot sngewbha.
“Kine ki jingïoh pdiang khusnam jong ki samla pule kam dei eh tang na ka bynta ki mementos bad ka song pisa hynrei ka dei ba ma ngi kum ka dong bad ka thaiñ ngi ai jingithuh ïa ka jingtrei shitom jong phi bad ai mynsiem ba phin nang leh bha namar kane ka dei ka lynti ïaid kaba phi dang shu sdang,” ong u Bah Methodius haba ai jingkren.
Shuh shuh u Bah Methodius u la ai khublei kyrpang ruh ïa baroh ki nongïoh pdiang khusnam bad kumjuh ïa ki kmie ki kpa kiba la wanrah nam ym tang ïa ka ïing ka sem hynrei ïa ka Mawshynrut Konstitwensi hi baroh kawei.
Na ka liang jong u MLA u la pyntip ruh ba ïa kane ka jingïalang pynkup burom ma u bad ka kynhun ka jong u kila ïaleh shitom ban pynpoi ïa ki jingpyntip sha baroh ki nongshong shnong ka Mawshynrut konstitwensi hynrei don pat kiba khlem lah ban wan ïashim bynta namar ka jingbym ïoh jingtip jong ki, kumta u la kyntu ïa ki bym shym ïohlad ha kane ka sngi ba kin sa pynpoi ïa ki mark-sheet ki jong ki sha ka ophis ka jong u bad sha ka kynhun ka jong u khnang ba un lah ban pynpoi ïa ki khusnam bad ki song pisa sha ki.
