New Delhi, Naiwieng:
Ka kynhun Enforcement Directorate (ED) ka la ong ba ka jingbteng jong ka jingleit khynra ha Kerala, ka la ïai bteng halor ka jingthmu ban khanglad ïa ki kam sniew kiba la ktah ïa ka imlang ka sahlang.
Kane ka jingpyntreikam, ka long ban wad ïa ki Bank Account, ki kot ki sla bad ki mar ki mata kiba la kynnoh ba ki don jingïadei bad ka jingmih na ka jingkhaïi drok, nalor ban lap ïa kiwei pat ki briew kiba donkti bad ki bynta jong ki kam jong ki.
Ka kynhun ED ka la pynlong ïa ka jingtalasi ha ki katto katne ki jaka ha Keralam kum shi bynta jong ka jingkhynra kaba kham heh ha kylleng ki saw tylli ki jylla jong ka thaiñ ba shaphang Shathie pyrshah ïa ki kynhun ba la suba ba ki dei ki nongkhaïi drok bad ki jingïadei jong ki ha ka kam pisa.
Ki jingtalasi ha ka jylla ki dei kiba ïadei bad ar tylli ki kam thok pisa kiba ïadei bad ka jingïoh kurup ïa u drok ba la suba ba u dei u drok hybrid bad u MDMA uba shongdor haduh T.18.5 klur.
Kane ka jingkhynra kaba kham heh ka kynthup ïa ki 30 tylli ki jaka ha kylleng ka Tamil Nadu, Karnataka, Telangana bad Kerala, kaba la thmu ïa ki suba donkti naduh ka Neetu Bai ba la kynnoh ‘Ganja Queen’ jong ka Hyderabad haduh ka Shamnad C K kaba sah ha Kozhikode ha ki kam thok pisa ba ïadei bad ka kam khaïi drok, ong ka tnat treikam jong ka jingkhaïi drok.
Ka jingkhynra ka la ktah ïa ki saw tylli ki jaka ha Ernakulam bad ki distrik ba marjan ha kaba ïadei bad ka jingïoh kurup jan 17 kg u Ganja Hybrid ba la suba ha u bnai Jymmang, uba shongdor kumba T.18 klur.
Ïa ki ïing jong ki saw ngut kiba shah kynnoh ha Kozhikode la talasi ha ka mukotduma ba kyrpang kaba ïadei bad ka jingïoh kurup ïa u dawai MDMA uba bun uba don 949.26 gram ha kad liengsuiñ Karipur ha u bnai Risaw jong u snem ba la leit. Ïa kine ki mar la antad ba ki kot sha ka T. 50 lak.
Ki pulit ka Ernakulam Rural ki la kem ïa u Ayush Vinod ha surok Aluva-Perumbavoor KSRTC Road ryngkat bad u kyiad ba la suba ba u dei u Hybrid Ganja uba khia 1.16kg.
Ha ka jingtalasi hadien kata ïa ka ïing jong u la lap shuh shuh sa kumba 15 kg u drok, hadien kata la kem ïa ka kurim jong u, ka Anila M A.
U paralok jong u Ayush u Harikrishnan V B u la shah kem halor ka jingkynnoh ba u dei uba pynbiang ïa une u drok.
Ka kynhun ED ka la ong ba ka jingtohkit ka la pynlong ïa ka jingïadei bad u Abu Tahir P B, uba la kynnoh ba u dei uba pynïaid bad teh lakam ïa ka kynhun network khaïi drok, bad u Jaisal N K ba la ju tip kyrteng kum u Marco, u briew na Kozhikode uba treikam na Bangkok, Thailand.
La kynnoh ba u Jaisal u la pynsuk ïa ki nongkit liengsuiñ lyngba ka Green Channel ha Cochin International Airport.
Ki tyllong khubor ki iathuh ba u Harikrishnan u la pynpaw ïa ka kyrteng jong ki saw ngut ki nongkit mar, kiba kynthup ïa u u Sanjay P, u Aneesh A, u Presjith bad u Sreejesh, kiba la shah kynnoh ba ki wanrah ïa ki mar na Bangkok.
Ïa une u drok la aiti sha u Harikrishnan ha kad liengsuiñ bad hadien la pynpoi sha ka Fais K T na ka bynta ban sam sha ki jaka bapher bapher kumba la thmu.
