Agartala, Naiwieng:
U MLA jong ka BJP ka Tripura, u Tafajjal Hossein, u la pan map halor ki jingkren kiba u la kren ha ka por ba ïalap elekshon ha Sonamura Nagar Panchayat ha Sepahijala distrik, hadien ba ka jingkren jong u, halor ka seng Party Tipra Motha bad ka jaitbynriew riewlum, ka la pynmih ïa ka jingïakynad. U la kynnoh ïa ka CPI(M) ba ka la shim ïa ka jingkren jong u na ka jinglong jingman bad ka la pynphriang ïa ki bynta ba la pynbeit ryntih ban pynmih ïa ka jingïakren ha ka saiñ pyrthei.
Ki jingkynthoh ki la mih ha ka por ba ïalap elekshon ha Sonamura Nagar Panchayat, ka distrik Sepahijala.
Ha kane ka jingïalap elekshon, la kynnoh ba u Hossein u la kren da kaba ai jingmut ba ki dkhot jong ka seng Tipra Motha, kaba mihkhmat ïa ka jaitbynriew Janajati (riewlum), ki dei ban thiah bad ki sniang, ban ri ïa ki, bad ban bam ïa ka doh sniang.
Haba pynshai ïa ki jingkren jong u, une u nongthaw aiñ ka BJP u la kynnoh ba ka jingkren jong u ka long ban pyrshah ïa kaei kaba u la batai kum ka jingpynbna ba ïai bteng jong ka CPI(M) ba ka BJP ka dei kaba pyrshah ïa ki Muslim bad ba ki Muslim kim lah ban kyrshan ne ïasoh bad ka seng.
U la ong ba u pyrshang ban pynshai sha ki nongthep vote Muslim ba ym dei ban pyndonkam ïa ki jingngeit niam ban buh jingkylli ïa ki jinglong ne jingjied jong u briew shimet ha ka saiñ pyrthei. Hynrei u la kynnoh ba ka CPI(M) ka la jied ban pynbeit ïa ka jingkren jong u bad pynphriang ïa ka da ka jingbatai kaba ïalam bakla, da kaba pyni ïa ka jingkren jong u kum ka jingpynjah burom ïa ka jaitbynriew riewlum.
U Hossein u la kyntait ba u don kano kano ka jingthmu ban pynmong ïa ka jingsngew jong ka jaitbynriew Janajati, da kaba kdew ba ka BJP bad ka Tipra Motha ki dei ki paralok ba ïatreilang ha ka sorkar NDA ha Tripura.
“Ngam shym la thmu ban pynmong ne lehbeiñ ïa ki para Janajati jong nga. Ka jingkren jong nga ka long tang ban ïakhun pyrshah ïa ki jingtip ba bakla ba la pynphriang da ka CPI(M) bad ban pynshai ïa kane ka mat sha ki para Muslim jong nga,” u la ong.
U MLA u la pynpaw ruh ïa ka jingsngewsih halor katei ka jingïakren, da kaba ong ba un panmap lada ki ktien jong u ki la pynmynsaw khlem da thmu ia ki dkhot jong ka jaitbynriew riewlum.
“Lada don kino kino ki jingkren jong nga kiba la pynsngewsih ïa ka jingsngew jong ki para Janajati jong nga, nga panmap naduh ka dohnud. Nga don ka jingburom kaba khraw ïa kawei pa kawei ka jaitbynriew, bad ban pynsngewsih ïano ïano kam shym la long satia ka jingthmu jong nga,” u la bynrap.
Da kaba kynnoh ba ki liang pyrshah ki thmu ban thaw jingïapher hapdeng ki jaitbynriew na ka bynta ka jingmyntoi saiñ hima sima, u Hossein u la pynskhem ba ïa ki jingkren jong u la pynpaw bakla bad ba ka jingthmu jong u ka long ban pyrshah ïa kaei kaba u khot ka jingpynbna saiñ hima sima jong ka CPI(M), ym ban thmu ïa kano kano ka jaitbynriew kyrpang.
