Ka jinghap jong u phria ha nongbah Shillong ka long ka jingpynkynmaw ba kumno ka mariang ka lah ban long kaba ym lah ban batai lypa bad ruh katno ka lah ban long kaba buh jingma ha kaba wat ka nongbah kaba itynnad ka lah ban wan hakhmat ka jinglong ka suiñbneng kaba ma bha. Ka jingïohi ïa u phria kaba tap ïa ki surok, ki tnum ïing bad ki jaka ba madan ka lah ban long kaba pynsngewtynnad, hynrei hapoh kane ka jingsngewtynnad ka don ruh ka jingsngewkhia kaba jur shaphang ka jingshngaiñ jong ki paidbah, ki jingkylla ha ka mariang bad ka jingpynkhreh jong ka nongbah na ka bynta kum kine ki jingjia bym poi pyrkhat na ka jingkylla ka suiñbneng.
Ka Shillong, kaba la bna bha na ka bynta ka jinglong ka suiñbneng kaba pyngngad bad ki jaka kiba itynnad, kam long thymmai shuh ban sakhi ïa ka jinghap jong u slap ba jur bad ha ka jingkylla kynsan jong ka suiñbneng. Hynrei u phria uba jur u lah ban pynthut ïa ka jingim kaba man ka sngi, ban pynjulor ïa ki kali, ki ïing, ki jingthung jingtep, bad ban buh jingeh ïa ki nongleit nongwan. Na ka bynta ki nongrep bad ki nongshong shnong ha ki jaka ba marjan, kum kine ki jingjia ka suiñbneng ki lah ruh ban mut ka jingduhnong ha ka ïoh ka kot kaba khlem khmih lynti.
Kaei kaba la pynlong ïa ka jinghap jong u phria ha ka 11 tarik u Naiwieng kaba kongsan, ka dei ka por bad ka jingktah jong ka. Ka jinghap u phria ka la jia ha ka por kumba 11 baje mynstep, ha kaba ki surok, ki lynti ïaid kjat, ki tnum ïing, ki jaka madan kum ka nan palok ki la tap lut da u phria bad wanrah ïa ka dur kumba ngi ju sakhi sha kiwei ki bynta jong ka Ri kum ha Sikkim, Shimla ne Kashmir. Watla ka la pynthut shipor ïa ka leit ka wan, hynrei ha kajuh ka por ngi ïohi ruh ba kiba bun ki la leh kmen ban ïalehkai bad kumjuh ruh ban shondur shondar, thik kumba ngi ju ïohi sha ki Jylla kiba ju hap ïor. Hynrei haba phai pat sha ki thaiñ nongkyndong, ngi shem ba ka jinghap u phria ka wanrah ïa ka jingïam briew hapdeng jong ki nongrep namar u pynjulor lut ïa ki jingthung jingtep, kum u kba, ki jhur ki jhep, ki syntiew bad kiwei-kiwei.
Ka jinghap jong u phria ka lah ban pynkylla shipor sha ka dur kaba itynnad jong ka nongbah Shillong, hynrei ka jingitynnad jong kato ka khyllipmat kam dei ban pynlamwir pat ïa ka jingmut jingpyrkhat ïa ngi na ki jingeh kum na ka jingwan syndet jong ka suiñbneng kaba kylla bad sniew. Kaei kaba paw ha kiba bun ka long kum ka tlang kaba kmen, na ka bynta kiwei pat ka long ka jingpynthut ïa ka jingim ba man ka sngi bad ka jingma kaba lah ban mih na ka bynta ka kamai kajih.
Ka jingktah jong kum kane ka jinglong ka suiñbneng kam dei tang ha sor. Ki nongrep ha ki jaka nongkyndong jong ka Meghalaya ki la mad bunsien ïa ka jingeh na ka jinghap bym dei por jong u phria, uba lah ban pynjot pynjulor ïa ki jingthung kiba dei ka jingtrei shitom da ki bnai jong ki nongrep. Haba shim ba ka rep ka riang ka long ka bynta kaba kongsan ha kamai jakpoh bad pyndap ha ïing ha sem, dei ban shim ba ka jingshah pynjot jong ki jingthung jingtep kum ka jingeh kaba khraw ha ka liang ka ïoh ka kot ym kum ka jingjia kaba sngewsih kaba wan jia.
Kumta ka Sorkar ka dei namarkata ban ïaid ym tang na ki jingai jingmut ba man ka por shaphang ka jinglong ka suiñbneng hynrei ban pynkhlaiñ ïa ka jingpynkhreh jong ka na kum kine ki jingjia. Ki jingpynbna shaphang ka jinglong ka suiñbneng ha ka por kaba biang, ka jingpeit bniah stet ïa ka jingpynjot ïa ki jingthung bad ki lad siew bai lutksan kiba shai ki long kiba donkam. Ki nongrep kiba shah ktah ha u phria ki dei ban ïoh jingïarap kloi khnang ba kum kine ki jingjia bym poi pyrkhat kin nym ktah ïa ki longïing kiba la shah ktah lypa.
