Shillong, Naiwieng 17
U Working President ka Meghalaya Pradesh Congress Committee (MPCC), Bah Pynshngaiñ N Syiem u la ong ba donkam lang ïa ki kyrtong kiba rim bad kumjuh ïa ki kyrtong kiba thymmai na ka bynta ka ilekshon MDC ka ban sa long.
Ha kaba ïadei bad ka jingpynbna ka Voice of the People Party (VPP) da ki durkhmat thymmai kum ki kyrtong bad uwei u kyrtong ba la dei lypa u MDC ka North Jowai, na ka liang u Nongïalam ka Congress u la ong ba um don ei-ei ban kynthoh namar kane ka shong ha ka jingstad jong ki nongïalam ka VPP ban rai.
“Ka jingdon ka kyrteng u Bah Andrew Shullai ha ka thup ki kyrtong MDC ka seng VPP, ki paidbah ki lah sngewthuh kham bha”, u la ong.
U la ong ba katkum ka jingsngewthuh jong u, donkam lang ïa ki briew kiba la don jingtip lypa ïa ka kam bad kumjuh ïa ki briew kiba dang thymmai.
“La ka long ha kano-kano ka bynta ruh ngi donkam hi ïa kiba la kham tbit (experience) bad kumjuh ïa kiba dang thymmai khnang ba kiba rim ki don la ka jong ka jingtbit bad kiba thymmai ruh kin don ïa ki buit thymmai ban trei hapoh ki district council”, u la ong.
Ha kawei ka liang u la ong ba Congress haduh mynta kam pat kyrkieh ban sei ïa ki kyrtong namar hap ban da leh janai bha, khnang ba kan ym wanrah jingeh hadien habud.
“Nalor ka jingïohi jong ngi ki Nongïalam, ngi hap ban sngap ruh ïa ka sur u babun balang, namar ka jingjied ka dei da ki paidbah. Don teng-teng ki babun balang ki pdiang eh ïa u briew kim pdiang ïa ka seng pat, don ruh kiba pdiang ïa ka seng katba ïa u briew pat kim mon”, la ong une u Nongïalam ka Congress.
U la ong kane ka dei ka sien ba nyngkong ba ka Congress ka kham leh suki ha ka jingpynbna kyrtong. U la ïathuh ba haduh mynta kiba bun kiba kwah ban ïakhun ïa ka ilekshon MDC ki la phah ktien.
“Ha ka jingïohi jong nga, ka jingpynslem khyndiat ka ïarap ïa ngi namar ki kyrtong kiba biang ki la sdang ban phai khmat, mynta ngi pyrshang katba lah ban lum ïa ki nongïalam, lah ban dei kiba na ka seng Congress, lah ruh ban dei ki bym pat don ha ka seng, tangba ngin ïashong lang ban ïoh ïa ki kyrtong kiba pdiang da ki paidbah”, la ong u Bah PN Syiem.
