Shillong, Naiwieng 17
U Nongïalam ka Congress, Bah Pynshngaiñ N Syiem u la ong ba ha ka ilekshon shiteng samoi ha Gambegre kaba dang shu dep thep ‘vote’, ka jingïakhun kan dei hapdeng jong lai tylli ki seng saiñpyrthei, kita ka Congress, ka National People’s Party (NPP) bad ka All India Trinamool Congress (TMC).
Ka ilekshon ha Gambegre la dep ban pynlong ha ka 13 tarik mynta u bnai bad ka jingñiew ‘vote’ kan long ha ka 23 tarik mynta u Naiwieng. Ha katei ka ilekshon ki don haduh 6 ngut ki kyrtong ba kynthup ar ngut ki kyrtong khlem seng.
Ka NPP ka kaba ïalam ïa ka Sorkar MDA, ka la pynïeng da ka kurim jong u Myntri Rangbah ka Jylla, ka Dr. Mehtab Chandee A Sangma, katba ka All India Trinamool Congress ka la pynïakhun da ka MDC kynthei ba marwei ha Garo Hills Autonomous District Council (GHADC) na Dengnakpara, ka Sadhiarani M Sangma kaba dei ruh ka kurim jong u MLA barim ka Rangsakona, bad ka Congress ka la pynïakhun da u Jingjang M Marak uba dei u paralok ba ïajan bha bad u MP ka Tura u Saleng Sangma bad ka BJP ka la pynïakhun da u Bernard Marak.
“Ka jingïakhun ha Gambegre ka dei hapdeng ka INC, NPP bad ka TMC, bad lada jop mano-mano ruh kan ym da ïapher than”, la ong Bah PN Syiem.
Haba kylli, u la ong ba ha ka ilekshon MLA ki paidbah ki don ka jingïajan bha bad ki kyrtong, la ka long bad kino-kino ki kyrtong, bad kane kan kham pher khyndiat lada ïanujor bad ka MP ilekshon.
“Lada ïakhun hi u Saleng ka jingïapher kan don namar u la don jingïadei lypa bad ki paidbah, hynrei une u kyrtong ba mynta ruh u biang bad ka shong haduh katno ka jingïadei jong u bad ki paidbah”, u la ong.
U Bah PN Syiem uba dei u Working President ka Meghalaya Pradesh Congress Committee (MPCC), u la ong ba katkum ka jingtip ba ka seng ka la ïoh ka long beit ba ka jingïakhun ka dei hapdeng ki lai ngut bad lehse kiba jop ruh kin tam tang khyndiat.
