Shillong, Naiwieng 17
Ka Voice of the People Party (VPP) ka la kren shai ba lada ki nongmihkhmat jong ka kim ïaid beit katkum ka jingbthah bad ki nongrim jong ka seng, kata ki lah ban ym ïoh tiket shuh ha ki ilekshon ban wan.
Ïa kane, la kdew da u nongaiktien ka seng, Dr. Batskhem Myrboh ha ka jingthoh ha ka rynsan lad pathai.
Haba pynpaw ba khnang ba baroh kin ïa tip lang ïa ka nongrim bad ka rukom treikam ka seng, u la ong ba ïa ka VPP la pynwandur ba ka seng ka dei kaba ha khlieh duh bad yn ym don MP/MLA/MDC ne nongïalam kiba lah ban long kham halor ban ïa ka seng.
U la ong ba ha ka VPP, ki nongïalam la ki dei ki MP/MLA/MDC ne ki ‘riew paidbah ki long mar-katjuh bad ki don mar-katjuh ka kyrdan ha ka State Executive Committee (SEC) kaba dei ka bor ba ha khlieh duh ha ka seng.
“Lada ki MP/MLA/MDC kim ïaid beit katkum ka jingbthah bad ki nongrim jong ka seng, ym don jingtikna ban ai tiket biang ïa ki ha ki ilekshon ban wan,” ong u nongaiktien ka seng.
Ha kajuh ka por, u la ong ba kiba ïoh tiket ha kawei ka ilekshon kam mut pat ba kin ïoh suk biang ha kawei pat ka ilekshon naba kin hap pynshisha ba ki trei hok bad pyndep hok ïa ka kam ba kin ïoh tiket biang.
Shuh shuh u la bynrap ba haba phai sha ka ilekshon MDC bad wat ha ki ilekshon ban wan, la pyllait laitluid bad yn pyllait laitluid ïa baroh ban phah ïa ki aplikeshon tiket.
U nongaiktien u la kren shai ruh ba ym donkam ban ïaid lyngba jongno-jongno bad ka rai ba ïano yn ai tiket, ka dei jong ka SEC halor ka jingai buit jong ka State Election Committee.
“Baroh ki lah ban ai ïa ki jingpynsngew jong ki ïano ban ai tiket hynrei ka dei ka seng ka ban rai hadien ka jingïathir sani ha ki komiti ba don ïa ka bor ban ïakren,” ong u Dr. Myrboh.
Kum ban shu kdew hangne, u MLA ka VPP na North-Shillong konstitwensi, Bah Adelbert Nongrum ha ka Sngi Thohdieng u la kynnoh ba ka State Executive Committee (SEC) jong ka seng ka la ïaid lait na u kum u nongmihkhmat haba ïadei bad ka jingpynbna kyrtong na bynta ka ilekshon MDC ban wan.
