Nongpoh, Naiwieng 17
Ki Nongïalam jong ka thaiñ Umdap lyngba ka Joint Action Committee, Umdap Area Development Organisation (JAC-UADO) ha ka Sngi Balang ki la pynkup burom kyrpang ïa ka Kong Bindas Syiem, ka longkmie kaba la mih marwei ban leit shong shah thngan ha jaka pynïeng kali ha syndah jong ka Additional Secretariat ka nongbah Shillong ban dawa maramot ïa ka surok Nongpoh-Umden bad Umden-Byrnihat ha kine ki khyndiat bnai ba la dep.
Katei ka jingpynkup burom ïa ka Kong Bindas Syiem ba la pynlong ha ïing dorbar jong ka shnong Pahammawlein 20 Mer da ka JAC-UADO ka dei hadien ba ka Sorkar Pdeng ka la pynbna ïa ka ‘tender’ ban pyntreikam noh ïa ka surok Lumnongrim Byrnihat-Umden ha ka jingjngai kaba 38 kilometer eiei bad kaba la mang ha ka jinglut kaba T.47.2 klur.
Ha kane ka sngi la wan ban ïadon ryngkat u Chairman ka JAC-UADO, Bah Lawrence Nongrum, Bah CB Syiem, CEM barim ka KHADC, Bah SW Mallai, President ka Nongpoh Block Congress Committee, Bah Bandari Ryntathiang, President ka Confederation of Ri Bhoi People lem bad kiwei kiwei ‘riew rangbah bad ki paid nongshong shnong ka thaiñ.
Ki ‘riew rangbah kiba la ai jingkren ha kane ka sngi, ki la ai ka jingïaroh ïa ka Kong Bindas Syiem kaba la mih shakhmat ban ïakhun ïa ka jingeh kaba ki paidbah ki la mad jingeh bad jingkordit, khamtam kiba pang ba shitom na ka jingsniew palat jong ka surok kaba pynïasoh sha kane ka thaiñ, kata na Nongpoh sha Umden bad na Byrnihat sha Umden.
Nalor kane, Ki la pynpaw ba kane ka jingmang tyngka jong ka Sorkar ban shna noh ïa kane ka surok na Lumnongrim sha Umden ka dei ka jingjop kaba khraw jong ka jingïakhih ka Kong Bindas Syiem bad kyrmen skhem ba ka Sorkar Jylla kan pynsted ruh ban mang tyngka noh sa ïa ka surok Nongpoh sha Umden kaba la jot rathai mynta da ki phew snem lynter.
Katba na ka liang ka Kong Bindas Syiem haba ai jingkren, ka la phla ba ki don ar ngut kiba la phah ïa ka ban leit shong shah thngan ha nongbah Shillong ha ki khyndiat bnai ba la dep, kita ki dei ka surok Umden-Nongpoh bad ka surok Umden-Byrnihat kiba la jot rathai bad ktik ïa ka mynsiem jong ka ban hap leh eiei.
Ka Kong Bindas ka la ïathuh ruh ba ka jingleit shong shah thngan ka jong ka ban dawa ïa ka surok kaba paka ha kine ki thaiñ ka dei ba hadien da ki phew snem ki paidbah ki hap ban mad jingeh bad jingkordit namar ka jingsniew ba palat jong ka surok Nongpoh-Umden bad ruh ka surok na Umden sha Byrnihat.
Kane ka longkmie ka la ïathuh ruh ba ka jingleit shah thngan ka jong ka kam dei satia ban ïoh jingmyntoi shimet lane ban kamai spah, hynrei namar ka jingkordit bad ka jingjynjar jong ki paidbah ha ka leit ka wan ha kine ki phew snem, ka la pynlong ïa ka ban mih shakhmat ban ïakhun ïa ki jingeh kaba kum ki paidbah ka thaiñ ki ïakynduh.
Shuh shuh, ka Kong Bindas ka la pynpaw ruh ïa ka jingsngewnguh sha baroh kiba la ïadon bynta ban ïarap ïa ka ha ki por ba ka la pynlong ïa ka jingïakhih hangtei ha nongbah Shillong ba kynthup naduh ki ‘riew shimet, ki kynhun seng bapher-bapher bad ki longkmie-longkpa, kiba la wan ban ïadon ryngkat bad ai mynsiem ïa ka ha katei ka jingïakhih.
