Shillong, Naiwieng:
Ka ICICI Foundation, kaba ïadei bad ka shnat treikam jong ka ICICI Bank, ka la kren shaphang ki jingdonkam ha ki lad ai jingsumar ha thaiñ Shatei-lam-Mihngi jong ka ri India. Naduh ka snem 2023, ka la ai jingïarap ïa kumba 9,100 ngut ki nongpang ha kylleng ki jylla kum ka Assam, Arunachal Pradesh, Manipur, Meghalaya, Mizoram, Nagaland, Sikkim, bad Tripura, ha kaba la ai ïa ki jingtei bad ki jingshakri kiban nang kham pynbha shuh shuh ïa ki lad ai jingsumar bad ban pynsuk ïa ki briew ban ïoh ïa ki lad jingsumar bad ki ban long ruh kiba bha tam.
Ban nang pynjanai ïa ka jingsumar TB ha Meghlaya: Ka ICICI Foundation ka la ai jingkyrshan lang ïa ka Reid Provincial Chest Hospital ha Shillong, Meghalaya da kaba ai iïka video Bronchoscope. Kane ka Technology ka la long kaba radbah ha ka ban ïarap ban lap bad ban ai jingsumar ïa ki jingpang shadem kum TB, ka jingpang bampong ha ki tor ne Lung Cancer, bad ki Pulmonary Infection.
Kane ka sienjam treikam ka la ïarap ban pynjanai ha kaban lap ïa ki jingpang bad ban nang pynduna ïa ka jingïap, khamtam na ka bynta kito ki nongpang kaba ka met jong ki ka ïaleh pyrshah ïa ka dawai TB.
