Shillong, Naiwieng 17
Ka Voice of the People Party (VPP) ka la pynlong ïa ka State Convention kaba ar ha ka 16 tarik mynta u bnai ha phyllaw shlem treikam jong ka seng kaba don ha Lad Nongkrem ha kaba la ïadonlang ki nongïalam jong ka seng bad ki nongkitkam kiba mihkhmat na ki 36 tylli konstitwensi.
Ha kane ka jingïalang la ïoh ïa ka kaiphot treikam jong ka seng naduh ba la seng ïa ka ha u snem 2021 ba la wanrah da u Secretary u Dr. Ricky Syngkon.
La pynsngew ruh ïa ki jingkheiñ jingdiah jong ka seng ba la wanrah da u Treasurer Bah Grossper Ryntathiang.
Hadien pat la ïoh ïa ka jingïaphylliew jingmut na ka bynta ban pynkhlaiñ shuh shuh ïa ka seng.
Ha ka sien kaba ar pat la pynlong ïa ka jingïajied ïa ki nongkitkam bathymmai hapoh ka jingpynïaid u Dr. A Rani kum u Proterm Chairman.
Ha ka jingïajied, ki nongkitkam na ki konstitwensi bapher bapher ki la shaniah biang ha u Bah Ardent Basaiawmoit kum u President, u Dr. Ricky Syngkon kum u Secretary bad kiwei kiwei ki nongkitkam ruh ki neh kijuh.
La pynthymmai ïa ki nongkitkam ka Youth Wing ha kaba la jied ïa u Bah Marbud Dkhar kum u President bad samla Nathaniel Mawrie kum u Secretary bad ïa ka Kong Phistila Syiem la jied kum ka President jong ka Women’s Wing.
Haba ai jingkren, u Bah Ardent u la ai khublei ïa baroh ki nongkitkam haba ki la jied biang ïa u kum President ka VPP.
U la pyntip ba ha kane ka jingïalang la thung ruh ïa ki Youth Wing bad Women Wing, namar ha kine ki lai snem ka seng kam pat lah ban pynwandur bha hynrei ha kane ka jingïalang la rai ban pynkhlaiñ ïa kine ar tylli ki tnat.
