Shillong, Naiwieng 17
Ka National People’s Party (NPP) ha ka sngi U Blei ka la weng noh ïa ka jingkyrshan na ka Sorkar Manipur kaba la lamkhmat da ka Bharatiya Janata Party (BJP) kaba ïalam da u N Biren Singh kum u Myntri Rangbah ka Jylla.
Kane ka jingweng noh ka NPP ïa ka jingkyrshan ka la wan hadien ba ki jingjia ïaumsnam ha Manipur ki la nang jur ha kaba ka Sorkar u Biren Singh kam shym la lah shuh ban tehlakam.
Ha ka shithi kaba la phah da u National President ka NPP, u Conrad K Sangma sha u National President ka BJP, u Jagat Prakash Nadda ha ka Sngi U Blei ka 17 tarik Naiwieng, 2024, ka NPP ka la pynpaw ka jingsngewkhia kaba jur halor ka jinglong-jingman ka suk ka saiñ ha Manipur.
U Conrad, uba dei ruh u Myntri Rangbah ka Meghalaya, u la ong ba ha kine ki khyndiat sngi, la ïohi ba ka jinglong-jingman ka la nang sniew ha kaba la sakhi ruh ïa ka jingduh ei ïa ki mynsiem briew ha Manipur bad ki paidbah ki la mad jingeh haduh katta-katta.
“Ngi sngew ba ka Sorkar Jylla ha Manipur hapoh ka jingïalam u Biren Singh kam lah shuh ban tehlakam bad ban pynbeit ïa ki kynrum-kynram bad ban wanrah biang ka jinglong-jingman kaba jai-jai. Kumba haba buh jingmut ïa ka jinglong-jingman kaba long mynta, ka NPP ka la rai ban weng noh ka jingai jingkyrshan ïa ka Sorkar kaba ïalam da u Biren Singh ha Manipur naduh mynta,” la pynpaw u Conrad ha ka shithi kaba la phah sha u National President ka BJP ha New Delhi.
Ka NPP ka don 7 ngut ki MLA ha Manipur. Kane ka jingweng noh ka NPP ban ai jingkyrshan lehse kan ym pat ktah ïa ka Sorkar u Biren Singh, namar ba ka BJP ka la don lypa ka jingbun paid. Ka BJP tang marwei ka la don 32 ngut ki MLA ha ka Ïingdorbar Thawaiñ ka Jylla Manipur.
Ka NPP ka dei kaba ju ïatreilang bad ka BJP ha Manipur bad ruh ha Arunachal Pradesh bad Nagaland.
Ha Meghalaya, ka BJP ka ai jingkyrshan ïa ka Sorkar NPP kaba ïalam da u Myntri Rangbah, u Conrad K Sangma. Ka BJP ka don tang 2 ngut ki MLA ha Meghalaya ha kaba uwei na ki u ïoh ban long kum Myntri Sorkar.
