Shillong, Naiwieng 18
Hadien ka jingshong shah thngan kaba khlem buhpor da ki samla pule ka Skulbah North-Eastern Hill University (NEHU) kaba la ïaid mynta la 317 kynta ha ki 13 sngi lynter, kata ha ka 18 tarik u Naiwieng 2024 ha ka por janmiet, u General Secretary ka KSU NEHU Unit, u samla Kevin Nelson Wanrap Rani u la kem pang biang kynsan hapdeng ka jingshong shah thngan bad kumta la pynkit noh mar-mar ïa une u samla sha Civil Hospital, Shillong ban ïoh ïa ka jingsumar.
Kum ban shu kdew hangne, ki samla pule jong ka Skulbah NEHU kiba don hapoh ka lama jong ka North-Eastern Hill University Students’ Union (NEHUSU) bad ka KSU NEHU Unit, ki la pynlong ïa ka jingïakhih da kaba shong shah thngan kaba khlem buh por naduh ka 5 tarik u Naiwieng 2024, hakhmat ka shlem trei-kam jong u Vice-Chancellor (VC) kane ka Skulbah, hadien ka jingdonkti jong u ban thung kam beaiñ ïa u Col Omkar Singh (Retd) kum u Registrar, u Amit Gupta kum u Deputy Registrar bad kiwei ki ophisar bad dawa ruh ba u dei ban weng kam noh mardor ïa ki nalor ka jingmih ki jingkynnoh pyrshah ba u dei u VC uba isih ïa ki trai ri-trai muluk nalor ki kiwei-kiwei ki kam.
Wat la ka Skulbah mynta ka la ïoh da u Acting Vice-Chancellor ba shipor ïa uba la tip kyrteng kum u Prof. Nirmalemdu Saha hynrei na ka liang ki samla pule tat haduh ba la pynmih ïa kane ka khubor ruh, ki dang pyneh beit triang ban ïai bteng ïa ka jingïakhih shong thngan jong ki kat haduh ba ki jingdawa jong ki baroh kin urlong.
Katkum ka jingïoh jingtip na u Publicity Secretary ka KSU NEHU Unit, u samla Meban Khawmawlong u la ïathuh ba ha ka 18 tarik u Naiwieng 2024 ha ka por kumba janmiet eiei, la hap ban pynkit biang ïa u samla Kevin Nelson Wanrap Rani sha Civil Hospital Shillong namar ka jingkem tlot biang ha ka met jong utei u samla.
