Shillong Naiwieng 18
Ki MLA ka liang pyrshah kiba dei jong ka Congress ki la byrngem ban iehnoh kam lem bad katto-katne ngut ki MLA ka liang synshar hadien ba ka shong suk shong shngaiñ ka la sniew shaba palat namar ka jingïaumsnam ka la nang jur bad bun ngut ki la duh ïa la ka jingim ha kine ki khyndiat sngi namar ka jingïakynad jaidbynriew.
U nongïalam ba la rim bha ka Congress ha Manipur uba la long teng u Myntri Rangbah, u Okram Ibobi Singh u la ong ha ka Sngi U Blei ba ka jinglong-jingman katkum ka riti synshar ka la khyllem hapoh ka Jylla.
Ki MLA na ka liang pyrshah bad liang synshar ki la byrngem ban iehnoh ïa ka jinglong MLA lada u Myntri Rangbahduh ka ri u Narendra Modi um shim ki lad ki lynti ban pynkut noh ïa ka jingïaumsnam.
U Ibobi u la kyrpad ïa ka Sorkar Manipur khamtam eh ïa u Myntri Rangbah u Biren Singh ba un pan por ban ïoh ïakynduh bad u Modi ha ryngkat bad ki MLA ka liang pyrshah.
U Ibobi u la ong ba ka Sorkar ar enjin (double engine) jong ka BJP bad ka jingkhyllem ka riti synshar bad ka jingkhihwin ka la ishyrkhei namar ki khyllung bad ki kynthei ki shah pynïap khlem kheiñ shuh ki dei na kano-kano ka jait ka kynja bad ka niam.
Haba kynthoh ïa u Biren Singh uba khlem lah ban pynbeit ïa ka jingïakynduh hapdeng ki MLA na Manipur bad u Modi, u Ibobi u la ong ba ym lah ban tip la u Biren Singh un pan por ne em ban ïakynduh bad u Modi.
“Lada u lah ban pynbeit, ngin ïakynduh ïa u Modi bad aipor ba un pynbeit noh khlem pynslem ïa ka jingjia ha Manipur lym kumta ki MLA na ka liang pyrshah bad liang synshar kin sa shim rai ha kano-kano ka por. Lada kim treh ban sngap ïa ngi ban ïada ïa ka Manipur ym don jingmut ban neh kum ki MLA bad ngin iehnoh kam ha kano-kano ka por,” la ong u Ibobi uba la kynthoh ruh ïa ka jingleh bym salia u Modi ïa ka Manipur.
Shuh shuh une u nongïalam ka Congress u la ong ba la u Biren Singh u dei ban hiar shuki ne em kata ka shong bad ka kam jong ka BJP tangba ki paidbah ka jylla Manipur kim pdiang ïa ka Synshar President.
U MP ka Congress na Inner Manipur, u Bimol Akoijam u la ong ba ka jingpynjari thymmai biang ïa ka AFSPA ka pyni ïa ka jingbym don ka mon ban pynbeit ïa kane ka jingeh kaba ïakynduh.
