Shillong, Naiwieng 18
Ka National People’s Youth Front (NPYF) ka la dawa na ka Sorkar ba kan phah tohkit bniah bad pynsaja katkum ka aiñ ïa kiba donkti ha ka jingjia tyngkhuh kali ha surok Shillong Bypass, kaba la wanrah ïa ka jingduh ei uwei u samla ïa la ka jingim ha ka lynti ban leit sha ka tamasa Cherry Blossom.
U President ka NPYF, Bah Kitborlang Nongrem u la pynpaw ka jingsngewsih ha kaba ïadei bad katei ka jingjia, ha kaba u la dawa na ka Sorkar ba kan pynshitom ïa ki briew kiba donkti ha katei ka jingjia khamtam hadien ba la shah kynnoh ba katei ka la jia hapdeng ka kali pulit kaba synran ïa ka kali u Myntri Sorkar (VIP) bad ka ar shaka.
U la ong ba kumba ju ïakren ba ym don mano-mano uba halor jong ka aiñ, bad na liang ka NPYF ka la dawa beit ban phah tohkit bad lada lap ïano-ïano kiba donkti dei ban shim kam beit katkum ka aiñ.
“Kumba ngi ju ong, ym don mano-mano kiba long kham halor ïa ka aiñ, nga ngeit skhem ba ka Sorkar kan tohkit bad lada lap ïano-ïano kiba donkti u dei ban ngat katkum ki kyndon jong ka aiñ”, la ong u Bah Nongrem, ha kaba u la ïathuh ruh ba na ka liang ka seng ka la pynsngew ruh ïa kane sha ki bor jong ka Sorkar hadien ba la ïohi ïa kane ka jingjia ha ki lad pathai khubor.
Ha kawei ka liang u Nongïalam ki samla ka National People’s Party (NPP) u la phah ka jingsngewlem sha ki bahaïing bahasem jong utei samla uba la khlad noh ha katei ka jingjia.
Lah ban kdew ba ha ka 15 tarik mynta u bnai uwei u samla ba la tip kyrteng kum u Hudderfield Rymbui (30 snem) u la khlad noh hashen ha lynti katba u dang leit thmu ban leit sha ka tamasa Cherry Blossom. La ïathuh ba kane ka jingkhlad jong utei samla ka dei na ka jingtyngkhuh bad ka kali synran VIP, ïa kaba la kynnoh ba katei ka kali ka la ïaid beit wat hadien katei ka jingjia ha ka surok Shillong Bypass.
