Shillong, Naiwieng 18
Ka Bharatiya Janata Party-Meghalaya (BJP) ka la ther tyngeh ïa ka National People’s Party (NPP) halor ka jingweng jingkyrshan jong ka na ka Sorkar BJP ha Manipur da kaba ong ba ka dei tang ka ‘drama’.
“Ka jingweng jingkyr-shan ka NPP na ka Sorkar BJP ha Manipur ka dei tang ka ‘drama’,” ong u Vice-President ka BJP, u Bernard N. Marak.
U la ong ruh ba kane ka rukom leh ka thmu ban pyni ïa ka jingbym ïadon bynta shuh jong ka NPP bad ka BJP namar ka ‘propaganda’ ka NPP pyrshah ïa ka BJP ka la ïalam sha ka jingkhyllem jong ka.
“Kan ym don jingktah eiei ïa ka BJP baroh kawei. Ïa ka jingkyrshan jong ka NPP ym shym da shimkhia ha Manipur namar ha ka jingshisha, ym shym la shim ba ka long kaba donkam naduh kaba sdang,” u la ong.
Haba kdew ba ka NPP ka la kner ïa ka jingkyrshan jong ka khlem ka jingteh kyndon tang ban ïadon bynta bad ka jingsynshar ka BJP ha Manipur, u Marak u la ong ba mynta ki weng noh ïa ka jingkyrshan jong ki ïa kaba la khmih lynti naduh ka sngi ba ki kner ïa ka jingkyrshan.
“Ka BJP ka lah ban synshar khlem ka jingïatreilang jong ki seng synrop bad ka BJP ka lah ban leh bha,” u la ong.
Shuh shuh u la bynrap ba ka NPP ka leh mynleh kyrshan ïa ka BJP tang ban ïoh jingmyntoi bad ban pynheh-pynsan ïa la ka seng hynrei ka jingjyllei ka jingbamsap kaba la bankhia lyngba jong ki, ka long kaba palat bad ka bym lah ban maramot.
“Ka BJP kan ym ailad ïa ka bamsap bad kan ym shah ruh ïa ka jingsynshar kaba kit ram hynrei ka thmu ban kyntiew ïa ka jingsynshar kaba khuid ba shai bad kaba bha,” ong u Marak uba dei ruh u MDC ka BJP ha GHADC.
Ka National People’s Party (NPP) ha ka Sngi U Blei ka la weng noh ïa ka jingkyrshan na ka Sorkar Manipur kaba la lamkhmat da ka Bharatiya Janata Party (BJP) kaba ïalam da u N. Biren Singh kum u Myntri Rangbah ka Jylla.
