Mawkyrwat, Naiwieng 18
Ka Village Defence Party (VDP) Mawkyrwat ha ryngkat ki Seng Longkmie, Seng Samla Shnong bad ki Seng bapher bapher hapoh ka shatri jong ka Joint Action Committee and Anti Social Elements (JACASE) kum shibynta ban rat dyngkhong ïa ki kam sniew naduh u drok ka kyiad bad ka khalai hapoh ka dong ka thaiñ khamtam eh hapoh ïew Mawkyrwat, ha kine ki khyndiat sngi ba la dep ki la pynlong ïa ka jingkhynra kyiad ha ïew Mawkyrwat. Ha kane ka jingkhynra la ïoh ban kurup kumba 4 byrni ka kyiad pyrsi bad da ki spah bilor ka kyiad phareng.
Ka jingshim ïa ka sienjam jong ka JACASE ban khynra kyiad na ka por sha ka por ha ïew Mawkyrwat ka dei hadien ka jingjyllei ki kam sniew naduh ka jingdih bad khaïi drok, die kyiad, ki kam tuh kam thiem bad ka jingshah pynïap ki mynsiem briew kiba ju jia na ka por sha ka por.
U Bah DD Thongni, President ka VDP Mawkyrwat bad u Bah Ferdinand Iawphñiaw, President JACASE haba kren sha ki lad pathai khubor hadien ba ki la dep ban theh ïa ka kyiad, ki la ong ba ka shnong Mawkyrwat na ka por sha ka por ka ju pyrshang ban rat dyngkhong ïa ki kam sniew bad kim kwah ba ka shnong Mawkyrwat khamtam ka ïew kan long ka ktem jong ki jingsniew.
Kine ki rangbah ki la ai khublei kyrpang ruh ïa ki seng bapher bapher kiba ju ïatreilang ban khynra ïa ki nongdih drok kiba mynta ki la kham duna ha ïew Mawkyrwat.
Ki la buh ruh ka jingmaham ïa baroh ki nongleh kam sniew naduh ki nongdih drok, ki nongdie kyiad bad ïa kiba khalai ha ki jaka kyndong ne hapoh kali bad kiwei kiwei kiba leh kam sniew ba lada lap kin leh da kaba tyngeh. Ki la pynpaw ruh ba nangne shakhmat kin sa pynkhlaiñ shuh shuh ïa ka jingkhynra khnang ban lap sa ïa kiwei pat kiba ju ïaleh pyrshah ïa ki kyndon aiñ jong ka shnong.
