Shillong, Naiwieng 18
U Bah Paul Lyngdoh uba dei Myntri ka Sorkar Jylla ba khmih ïa ka Kam Jngohkai u la kyntait ba ka jingkhlad jong u samla ka dei na ka daw ka kali pulit kaba synran ïa u, ha kaba u la ong ba ki don katto-katne ki ‘riew shim kabu kiba pyrshang ban pynthohbria ïa ka Sorkar bad ïa u shimet namar ba ka tamasa Cherry Blossom kaba la long mynta u snem ka long kaba jop.
Ha ka janmiet jong ka 15 tarik mynta u Nai-wieng ka la mih ka jingjia tyngkhuh kali ha surok Shillong Bypass katba ki kali ki dang tuid ban leit sakhi ïa ka tamasa Cherry Blossom ha madan Kurkalang, Ribhoi District. Ha kane ka jingjia la kynnoh ba ka kali pulit kaba synran ïa u Bah Paul Lyngdoh ka la rat ïa kawei ka ar shaka ha ka thaiñ ICAR haduh ba uwei u samla uba ñiah ïa kane ar shaka u la khlad hashen, katba katei ka kali pulit ka la ïaid beit shakhmat khlem sangeh wat hadien katei ka jingjia.
Haba pynshai halor katei ka jingjia, u Bah Paul u la ïathuh ba u la mih ryngkat na ïing u Myntri Rangbah, u Conrad Sangma ban leit plie ïa ka tamasa.
“Nakhmat ka kali u Myntri Rangbah ki la don lypa ki kali pulit ba synran, bad sa bud ka kali jong nga bad hadien ka kali jong nga ki don biang sa kumba 7-8 tylli ki kali bad sa bud biang ki kali jong ki pulit ba synran”, u la ong.
U la ong ba kiba kynnoh ki la dei ban ïohi ba ka jingïaid ki kali ka suki bha namar ka jingjur palat ka dheng kali, kaba la pynlong ruh ba ki kali kaba u shong kan sahkut 4-5 sien ha lynti. U la ong ba ha kano ka rukom ka kali kaba synran ïa u kaba bud na shadien kan pynher stet haba ka kali jong u nakhmat ka sahkut 4-5 sien.
Shuh shuh u la ong ba ha katei ka janmiet ki don shibun ki kali kiba ïaid na baroh arliang ka surok, bad pynpaw ba lada ka don kum kata ka jingshah rat ïa ka ar shaka ne jingtyngkhuh ki kali, kumno ka lah ban long ba ym don uwei ruh uba ïohi ne sakhi.
“Lada ka don kum kata ka jingtynrah da ka kali ïa ka ar shaka ka mut ka kali ka lah dei ban sangeh, namar ym lah ban shu ïuh beit ïa u briew nalor ba ki ïa don ar ngut, nga lyngngoh kumno ka mih kata ka jingkynnoh ba la shu tynrah bad phet, haba nga uba ïaid nakhmat ruh nga sahkut”, u la ong.
Katkum ka jingïathuh u Bah Paul, u la ong ba u la ïoh jingtip ba ka don da kawei pat ka kali kaba tynrah ïa ka ar shaka hadien ba katei ka ar shaka ka la tynrah ïa ka kali ki pulit synran nadien.
“Ban kynnoh ba kane ka jingjia ka ïa don bynta bad ki kali pulit kiba synran ïa ngi ka long ka bym shongnia hangno-hangno ruh, ngi ïoh jingtip halor kane ka jingjia ruh hadien ba la dep plie ïa ka tamasa”, u la ong.
Haba kynthoh shuh shuh, u Myntri u la ong ba kine kiei-kiei ki mih namar ka jingpihuiñ-jingbishni, ha kaba u la ong ruh ba ki briew kiba bun kim kwah ban ïohi ba kiei-kiei kin ïaid beit, bad bynrap ba kane ka dei ka jingmut jong ki briew ba dang sahdien ka rukom pyrkhat.
