Shillong, Jymmang 26
U Bah Denzil Raynard Chen, MDC na Jaiaw Konstitwensi, uba dei ruh u Executive Member ka Khasi Hills Autono-mous District Council (KHADC), bakhmih ïa ka Elaka, u la pynshai ba ka jingsospon ka Council ïa u Syiem ka Hima Mylliem, kadei halor ka jingbym pat siew dep ïa ka 1/8 share, kaba naduh ki snem ba la dep.
Haba kren sha ki lad pathai khubor, u Bah Denzil u la ïathuh, ba ka District Council bunsien ka la phah da ka jingthoh sha ka Hima Mylliem, ban siew dep noh ïa kane ka 1/8 share sha ka Council, hynrei kam shym la suitñiew ban leh kumba la bthah.
Haba ïadei bad kane ka kam sospon shipor ïa u Syiem ka Hima Mylliem, u Bah Denzil Raynard Chen bad u CEM ka KHADC, u Bah Winston Tony Lyngdoh, ki la ai lang ïa ka jingpynshai, kaba kham bniah halor kane ka kam.
“U Syiem ka Hima Mylliem, kata u Ainam Manik Syiem, u la pynkheiñ ïa ka aiñ 11 (5) jong ka Khasi Hills Esta-blishment Management and Control of Markets Regulations Act, 1979, bad 1/8 share, kaba u Syiem u dei ban siew sha ka Council,” la ong u Bah Denzil.
Shuh shuh u la ïathuh, ba ka Council ka la phah da ka jingthoh sha ka Hima, ban siew noh ïa kane ka pisa ba dangsah, hynrei ïa ka 1/8 share ka Hima Mylliem ka shu siew da ka token, da kaba ïathuh ba naduh u snem 2018, ka pisa bym pat siew ka poi kumba 3 klur tam bad kam dei 300 klur, kumba la paw ha ki kot khubor.
“Haba ïadei pat bad ka 10 %, ka Hima Mylliem lei, kam pat siew naduh ki por ba mynshuwa sha ka District Council. Bad ka 1\8 share ruh kim ju siew la bun bun snem, bad ngi la pynkynmaw bunsien ba ka Hima kadei ban siew ïa kane ka 1\8 share hynrei kam shym la suitñiew. Kumta ka District Council kam banse ban shim ka sienjam ban sospon shuwa ïa u Syiem ka Hima Mylliem, ban pyndep ïa ka jingtohkit, khnang ban tip thik pa thik ïa ka pisa ba hap ban siew,” u la ong.
Haba kylli, u Bah Denzil u la ong ba ïa ka jingtohkit haba ïadei bad ka pisa bym pat siew ka Hima Mylliem sha ka Council, yn sa sdang noh shen.
