Nongstoiñ, Jymmang 26
U President ka NPP Meghalaya State Unit u Bah Prestone Tynsong uba dei ruh u Symbud Myntri Rangbah ka Jylla u la kyntu ïa ki longkmie ki longkpa, ki khun samla ba kim dei ban shah ïalam bakla ha ka jingkren jong kiwei lehse kiba pynsngewthuh bakla ba ka Sorkar kala shu thiah, ka Sorkar kam trei kam lane ka Sorkar kaba tuh kaba thiem.
U Bah Prestone u la pynpaw ïa kane haba ai jingkren ha ka jingïalang ai jingpynshai bad pynithuh jong ka party ïa u kyrtong jong ka na ka bynta ka ilekshon MP shiteng samoi ïa kaba la pynlong ha sor Nong-stoiñ ha ka sngi Ba-ar.
“Kum ki nongshong shnong phi dei ban long kiba shemphang bad ban nym shah ïalam bakla ha ki jingkynthoh kiba mih man ka sngi kaba ngi ïohi wat ha ki rynsan social media,” la ong u Bah Prestone.
Shuh shuh u Bah Prestone u la ong, “Balei te ngi ïa lynthem maw iwei ïa iwei pat, balei ko ki lok kiba im ha ka rynsan ‘social media’, phim wan ai jingmut lem ïa ngi ba ngin nang trei shitom shuh shuh nalor ka roi ka par kaba ngi lah ban saiñdur ïa ka shnong ka thaw ïa ki paidbah nongshong shnong khnang ba kan don ka shong suk ka shong shngaiñ jong ki khyllung ki khynnah, ki kynthei bad ïa baroh ki nongshong shnong jong ka Jylla”.
U la ong, “Ki kyntien kiba sngew shyrkhei ngi tharai ki longkmie ki longkpa ki samla kiba tip briew tip Blei, phim kwah shuh ban peit ïa ki jingkynthoh ha ki rynsan ‘social media’ namar kala shyrkhei haduh katta-katta”.
U Bah Prestone u la ong ruh ba ka Sorkar India ka ai bad ka shaniah ïa u Dr. Nonglait ba un long u Director jong kata ka Colleges Development Council hapoh ka Jylla Meghalaya, baroh ki College ki hap hapoh ka jingpeit jong une u rangbah uba la long ruh u ophisar rangbah hapoh NEHU um dei shuh tang u nonghikai.
Shuh shuh u la ong ruh ba, u Myntri Rangbah ka Jylla mynta u don sha Delhi ban leit ai khublei kyrpang ïa u Myntri ka tnad pule puthi namar ïa ka sobjek Khasi bad Garo la dep pynrung ha ka CBSE bad kane ka burom ka dei na u Dr. DRL Nonglait bad kane ka dei ka jingïohi jong ngi ïa u soh uba thiang bad ka jingïaleh kam pat kut tang hangta.
U la pynpaw ruh “Ngi kum ka Sorkar ngi dang sahnud, u Dr. Nonglait kum u President ka KAS ruh u dang sahnud balei kan shu long ktien Sorkar tang hapoh ka Jylla, to ngin ïa leit syndon sha Delhi ban pynrung syndon ha ka kitab kaba 8 khnang ba kane ka ktien kan kylla long ka ktien kaba la pynkup bor da ka riti synshar ka Ri India”.
