Shillong, Jymmang 26
U Myntri ka Sorkar u Bah Wailadmiki Shylla u la kdew ïa ki kam pynroi jong ka Sorkar MDA kiba la wan ha Rilum Jaiñtia bad ong ba ka Meghalaya ka donkam ïa u MP u ban lah ban buddien ïa ki jingdonkam bahakhmat jong ka Jylla ha Delhi.
U Bah Wailad u la pynpaw ïa kane, haba ai jingkren ha ka jingïalang ïalap ilekshon na ka bynta u kyrtong ka NPP u Dr. DRL Nonglait ban ïakhun ïa ka ilekshon MP shiteng samoi.
“Ka MDA ka dei ka Sorkar kaba ju sngap ïa ki paidbah bad sngew-thuh ïa ka jingeh ka jong ki,” la ong u Bah Wailad ha ka jingïalang ba la pynlong ha Chilliangraij Dorbar Hall ha ka sngi Nyngkong.
“Peit ha kylleng ki bynta jong ka Rilum Jaiñtia mynta – ki surok kiba thymmai ha kylleng ki jaka. Ym tang ha Nartiang lane ha Jowai, hynrei ha baroh ki konstitwensi,” u la ong bad bynrap ba ka T.23-24 klur la bei ban kyntiew ïa ka Kiang Nangbah Stadium, ki madan ïalehkai phutbol la dep ban pyndep ha Amlarem, Khliehriat bad Shangpung, katba ki jingpyntrei ha Mukhla Sohshrieh, Wapung bad Sutnga ruh ki la jan dep artad.
U la kdew ruh ïa ka jingkyrshan na ka bynta ka Thomas Jones, Nongtalang, Shangpung bad East Jaiñtia community college, bad ka college sorkar ba thymmai ba la mang ha Jalaphet.
“Kham mynshwa phin ïohi ba ki nonghikai ki pynlong jingïakhih habar jong ka Secretariat. Mynta phin nym ïohi shuh ïa kum kine ki jingïakhih namar ka Sorkar ka la ai ïa ka jingsiew kaba biang (structured pay) sha ki,” u la ong.
Ha kaba ïadei pat bad ka koit ka khiah, u la ong haduh T.53 klur la dep ban mang ban kyntiew ïa ka Ummulong CHC sha ka Integrated Hospital.
U Bah Wailad u la ai ka jingïaroh ïa ka Sorkar na ka bynta ka jingsdang ïa ka Shillong Medical College, ka ban sa sei 50 ngut ki doktor manla u snem bad ruh ba ka Tura Medical College la khmih lynti ba kan sa kynthup sa 150 ngut mynta u snem.
“Hynriew bad hynñiew snem mynshwa, ka mang tyngka jong ngi ka dei T.13,000-14,000 klur. Mynta ka la kiew sha ka T.30,000 klur,” u la ong.
Haba ban jur halor ka jingdonkam ïa u MP, u la bynrap “Ngi donkam ïa u MP jong ngi ha Delhi ban buddien ïa ki jingdonkam jong ka Jylla, khamtam ka jingpynrung noh ïa ka ktien Khasi ha ka Khyrnit kaba Phra. Ka ïingdorbar ka la mynjur da kawei ka rai hynrei ka jingai jingmynjur mynta ka shong pat ha ka Sorkar Kmie.”
“Ki nongmihkhmat kiba shah jied kim lah tang ban shu kren. Phi jied ïa ngi ban trei bad wanrah ka roi ka par. Dei namarkata ngi donkam ïa u MP u ban buddien ïa ki kam bad ka Sorkar Kmie,” u la ong.
U Bah Wailad u la ong ba ka jinglong jingman jong ka seng saiñ hima mynta, ka la aibor ïa ki Jylla kiba rit. “Ka BJP mynta ka don ha ka khim khait. Uwei u MP jong ngi ruh u don ka bor. Dang shen, ki la pynbiang da ka ‘private jet’ na ka bynta u MP ka Rajya Sabha jong ngi ban vote halor ka bill kaba kyrkieh. Lada phi jied ïa u Dr. Nonglait, ngin sa don ar ngut ki MP ha Delhi.”
U la pynbna ruh ïa ka ‘nursing college’ kaba nyngkong ha West Jaiñtia Hills, ka T.2 klur ka jingïarap sha ka Thomas Jones College, bad T.2 klur sha ka Dr Tunnel Hospital – ki jingïarap kiba nyngkong eh sha ki hospital shimet.
“Ka polisi jong ngi ka long ban kren khyndiat bad trei shibun,” la ong u Bah Wailad, da kaba kyntu ruh ïa ki nongthep vote ba kin kyrshan ïa u Dr. Nonglait.
