Nongstoiñ, Jymmang 26
U kyrtong MP sha ka ilekshon shiteng samoi na ka NPP u Dr. DRL Nonglait u la ong ba kum u kyrtong u ban ïakhun ha ka ilekshon um dei satia tang u kyrtong jong ka NPP hynrei kum uba la ju shim ïa ki mat ki jura na ka bynta u paidbah bad pynpaw ba u dei u kyrtong jong ki paidbah, ym dei satia u kyrtong tang jong kawei ka party hynrei jong baroh ki jingthep vote.
Ïa kane na ka liang jong u Dr. DRL Nonglait u la kren ha ka jingïalang ai jingpynshai jong ka NPP halor ka ilekshon MP shiteng samoi ïa kaba la pynlong ha sor Nongstoiñ ha ka sngi Ba-ar jong ka taïew.
U Dr. DRL Nonglait u la ong, “Nga shim ïa kane ka lyngkor ban len ïalade, nga don mynta ha ka kam kaba bit kaba biang, nga don mynta ïa ka jingkitkhlieh kum u nonghikai bad u ophisar jong kawei na ki tnad ha skulbah NEHU bad lada ngam pyrkhat ïa ka khia ka shon jong u paidbah ngam don kam ïa nga ba ngan ïaid sharum shaneng ban peit miet peit ïong ban leit pyrta namar ka kam kaba nga don ka biang hynrei na ka bynta ka ri bad ka jaidbynriew, nga hap ban mih”.
U la ong ruh, “Nga shim ïa kane ka lyngkor da ka jingsngew rit, nga shim ïa kane ka jingkitkhlieh da kaba len ïalade, ngan nym ïoh nong eiei na bynta ïalade hynrei ka long beit na ka bynta ban kyntiew ïa ka ri bad ka jaidbynriew ban pynurlong ïa ki mat ki jingdawa ba ngi ïeng ha baroh shi katta na ka bynta ka jingmyntoi jong phi u paidbah”.
U Dr. DRL Nonglait u la kyntu ruh ban weng noh ïa ka jingïasngew party, ban weng noh ïa ki jingïasngew jngai iwei ïa iwei pat lane kawei ka seng na kawei pat hynrei ban wan shakhmat ban ïa kyrshan lang ïa u kyrtong jong ka NPP.
Ha kane ka sngi, nalor u MLA ka Nongstoiñ Bah Gabriel Wahlang, la donlang ruh u President ka NPP Meghalaya Bah Prestone Tynsong uba long ruh u Symbud Myntri Rangbah ka Jylla, u RG Momin MLA ka Rambrai, u MDC ka Mawshynrut Bah Sraly Rashir kum u Sordar ka shnong New Nongstoiñ, u Bah Lurshai Kharbani MDC ka Rambrai, ki nongïalam ka NPP jong ka Jylla bad kiwei kiwei.
