Shillong, Jymmang 26
Ka kynhun ki nongri sniang ka Jylla ïa kaba la tip kum ka Federation of Piggery Farmer of Meghalaya ha ka 26 tarik u Jymmang 2026 ki la leit ban ïakynduh ïa u Myntri ka tnad Animal Husbandry and Veterinary ka Jylla u Bah Sanbor Shullai ha kaba ïadei bad ka jingïakynduh jingeh jong ki ban siew ïa ka ram ïa kaba ki la shim na ka bynta ban ri sniang namar ka jingïap khlam ki sniang na ka African Swine Flu.
U Bah Prosper Dorphang uba dei u Chairman ka kynhun hadien ba ki la mih na kamra u Bah Sanbor Shullai, u la ong ba na ka liang ka Federation ki la kyrpad ïa ka Sorkar ba kan map noh ïa ki ban siew ïa ka ram kaba kot T.20 lak kaba ki hap siew pyndep na ka bynta 7 snem ba ki la shim namar ba ki sniang kiba ki la shim ruh ki la ïap 100 na ka 100 kumta kim lah shuh ban siew.
Ha kane ka jingïakynduh ïa u Myntri, ki la ïakren ruh halor ka jingpynïaid ïew ïa ki sniang namar ba ïa ki sniang napoh ka Jylla kim don shuh kiba thied bad ym lah die namar ki sniang ba nabar ki wan man ka sngi bad ka kham tad ruh ha kaba ïadei bad ka dor ka mur.
Ki la ïathuh ruh ba ïa ki sniang ‘local’ ki hap ban die tad noh bad ki la duh nong bha ym tang katta ki la ïathuh ba ka jingpang ka dei ba wanrah ïa ki sniang kiba nabar namar ki sniang kiba nabar ki wan ha ryngkat ki jingpang.
U MLA ka Mawkynrew Bah Banteidor Lyngdoh uba leit synran lang ïa ki nongri sniang ban leit kynduh ïa u Myntri u la bynrap da kaba ong ba ka jingwan ki sniang na shabar ka wanrah ïa ki jingpang namar bym don ka jingpeit bniah ha ki jaka rung jaka mih.
U la kyntu ïa ki nongshong shnong ban ïathied beit ïa ki sniang ‘local’ napoh ka Jylla ym ïa ki sniang ba wan na shabar khnang ba ki nongri sniang napoh ka Jylla kin lah ban pynïaid ïa ki sniang bad ka duna ka jingïoh pang ki sniang.
Ha kane ka jingïakynduh jong ki, na ka liang u Myntri u la ai ka jubab ba halor kane ka jingpynsngew jong ki yn sa pynlong da ka jingïalang kyrpang ha ka taïew ba nyngkong jong u bnai Jylliew 2026 ban ïa pynbeit bad ban shim ïa ki rai ban weng syndon ïa ki jingeh ki nongri sniang.
