Nongpoh, Jymmang 26
Uwei u nong Rajasthan u la shah kem noh ha ki pulit ka Ri Bhoi halor ka jingdonkti ban shna account thok ha ki rynsan ‘social media’ bad ban dawa pisa ruh ha ka kyrteng jong u Vivekanand Singh Rat-hore, Deputy Inspector General jong ka Western Range ka Jylla.
Katkum ka jingpyllait khubor ki pulit ka Ri Bhoi, la ïathuh ba ïa utei u briew uba la tip kyrteng kum u Jahul Ali, khun jong u Farukh Khan na ka shnong Kakrali Meo, Alwar, jong ka jylla Rajasthan la ïoh ban kem noh ha ka 23 tarik mynta u bnai na Jaipur, Rajasthan hadien ka jingbuddien kaba bniah da ki bor pulit.
La ïathuh ruh ba katei ka kam kala paw pyrthei hadien ba ki la don ki briew kiba la shah shukor pisa ha utei u Jahul Ali lyngba ka rynsan social media kiba la ujor ruh ha ka thanad Nongpoh bad la register case pyrshah ïa u ha ki kyndon aiñ jong ka Bharatiya Nayaya Sanhita (BNS) bad ka Information Technology Act.
Halor kane ka bynta, na ka liang ki bor pulit ki dang pynlong ïa ka jingtohkit kaba bniah pyrshah ïa utei u Jahul Ali uba la pyndonkam bakla ïa ka kyrteng utei u heh pulit ophisar ka Jylla ban thok ban shukor pisa ïa ki paidbah lyngba ki rynsan social media.
