Shillong, Naiwieng 18
Ki pulit ka thanat Umïam ki la kurup noh ïa kawei ka kali pulit kaba synran ïa u Myntri ka Sorkar Jylla, u Bah Paul Lyngdoh halor ka jingkynnoh ba katei ka kali pulit ka la leit rat ïa kawei ka ar shaka ha surok Shillong Bypass haduh ba uwei u samla u la khlad hashen.
Katkum ka jingpyntip na ki pulit ka Ribhoi District, ha ka 15 tarik mynta u bnai ki pulit ka thanat Umïam ki la ïoh jingtip ba la pynkit ïa ar ngut ki briew kiba ngat ha ka jingtyngkhuh kali sha Holy Cross Hospital kaba don ha Umbir.
La ïathuh ba ha ka jingtohkit la lap ba kawei ka ar shaka (bike) kaba don ïa u nombor ML05 AD 0566 ka la ïatyngkhuh bad kawei ka kali pulit ba synran ïa ki heh ki haiñ. Ha katei ka jingjia u nongñiah jong ka ar shaka u la khlad noh ha shwa ban poi sha ka jaka sumar, katba kawei ka samla kaba shong lang ha katei ka ar shaka ka la shu mynsaw malu-mala.
Halor kane ka jingjia ki pulit ki la pynrung mukotduma ha thanat Umïam hapoh ka kyndon 281/324(1)/106(1) BNS. La ïathuh ruh ba ïa ka kali pulit kaba don ïa u nombor ML 02 5612 kaba don bynta ha katei ka jingjia la kurup noh da ki pulit.
La ïathuh ruh ba haduh mynta ym pat shym la kem ïano-ïano ruh halor katei ka jingjia, hynrei na ka liang u Investigation Officer (IO) u la khot hajir ïa u nongñiah jong katei ka kali pulit hapoh ka kyndon 35 jong ka BNSS.
Haba kylli halor ka jingtohkit ïa katei ka jingjia, u Bah Paul Lyngdoh u la kyntait ïa ka jingkynnoh don bynta ka kali ba synran ïa u, hynrei u la ïathuh ba ka jingtohkit ka la ïaid bad ki pulit ka thanat Umïam ki la kurup noh ïa ka kali pulit ba la synran ïa u bad la tohkit ruh ïa ki pulit kiba shong ha katei ka kali.
Haba kylli shuh shuh halor ka jingsospon ïa ki pulit bad u nongñiah ïa ka kali, u Bah Paul u la ong ba ïa mynta ka dang ïaid beit tang ka jingtohkit da u Investigating Officer.
