Shillong, Naiwieng 18
Ka Sorkar Jylla lyngba ka tnat marbam ka Jylla kan ïatreilang bad kan United Nations World Food Programme (UN-WFP) na ka bynta ban pynkhlaiñ ïa ka jingpynpoi bad sam mar rashon sha ki paidbah bad kum ka jingpynkhlaiñ ïa ka jingpeitngor bad buddien ïa ka jingpynpoi ïa ki mar rashon yn pyntreikam noh ïa ki kor kum ka Global Positioning System (GPS).
Kane ka mat ïatai ka la mih ha ka jingïalang kaba la long hapdeng ka Sorkar Jylla bad ka United Nations World Food Programme (UN-WFP) ha ka Lah Sngi U Blei ha kaba u Myntri ka tnat marbam ka Jylla u Bah Comingone Ymbon bad ka Elisabeth Faure, kaba dei ka Country Director jong ka United Nations World Food Programme (UN-WFP) nalor ki ophisar ki la donlang.
Kane ka jingïakynduh ka long ban pynkhlaiñ ïa ka Public Distribution System (PDS) lane ka rukom pynpoi ïa ki mar rashon sha ki paidbah da kaba shim ïa ki sienjam lyngba ka jingïatreilang.
Ha kane ka jingïalang la ïakren kham sani ha kaba ïadei bad ki jingeh ki bynta kiba dei ban pynbha da kaba thaw-lad ruh kumno ban pyndonkam ïa ki kor ki bor ka juk mynta ki ban ïarap ban wanrah ka rukom treikam kaba khuid haba pyntreikam ïa ka jingsam mar rashon ha kane ka Jylla.
Ka la don ruh ka jingïakren kumno ban thaw ki jingkdew lynti (roadmap) kiba ïahap bad ki jingthmu jong ka Sorkar Jylla ban pynkhlaiñ ïa ka jingsam marbam. La don ruh ka jingsam ïa ki buit treikam kiba la pyntreikam ha kiwei pat ki Jylla bad ki bynta kiba long ka jingjop kiba la pyntreikam da ka UN-WFP.
