Shillong, Naiwieng 18
U Vice-Chancellor (VC) ‘In-charge’ ka North Eastern Hill University (NEHU), u Prof. N. Saha u la ban jur bad kular ba na ka liang jong u, u minot thop ban wanrah biang ïa ka suk ka saiñ bad ka jinglong-jingman kumba ju long na bynta ka jingïaid beit ka pule-puthi bad ka roi ka kiew ha ka skulbah.
“Ka NEHU ka la sakhi ïa ka kynrum-kynram ha kine ki taïew ba la dep. Kum u VC ‘In-Charge’, nga kwah ban kren sha uba bun balang jong ka skulbah bad pyntikna ïa baroh ba ngi don ka jingshimkhia ban wanrah biang ïa ka jingsuk, ka jinglong kumba long man ka sngi, bad ka jinglong-jingman kaba biang na bynta ka jingpule bad ka roi ka par,” ong u Prof. Saha ha ka kyrwoh khubor.
U la ong ruh ba hadien ba u la shimti ïa ka kam, ka jingthmu ba kongsan ka long ka bha ka miat jong ki samla pule ha kaba u la ïakynduh hi dalade ïa ki ha ki katto-katne ki khep, da kaba pynpaw ïa ka jingsngewkhia kaba jur halor ka koit ka khiah bad ka bha ka miat jong ki, khamtam hapdeng ka jingïakhih shah thngan.
“Wat la nga la pyrshang katba lah ban pynsngewthuh ïa ki ban pynsangeh noh ïa ka jingïakhih, nga dang don ka jingkyrmen ba lyngba ka jingïakren bad jingïasngewthuh jingmut, shen yn sa lah ban poi sha ka jingïapynbeit. Nga la ïakren man ka por bad ka kynhun ka koit ka khiah lem bad ki doktor kiba khmih ïa ki samla pule kiba don hapdeng ka jingïakhih shah thngan,” u la ong da kaba bynrap ba ka koit ka khiah ki samla pule ka long ka jingkhuslai kaba khraw tam jong u, bad duwai jur ba kan ym mih kano-kano ka jingeh ha ka liang ka koit ka khiah.
Haba kdew ba ki la don ki jingïalang bad ka NEHUSU, NEHUNSA, bad NEHUTA, u Prof. Saha u la ong ba kine ki jingïakren ki la long kiba tei ha ryngkat ka jingïatreilang, bad u sngewkmen ban pyntip ba ka NEHUNSA ka la mynjur ban ailad ïa katto-katne ki bynta ba kongsan jong ka ‘Administrative Section’ ban sdang biang ïa ki kam.
Haba ïadei bad ka jingweng ïa ki jingeh ba kongsan, u la ong ba la thaw ïa ka komiti tohkit kaba kynthup ïa ki nongmihkhmat na baroh ki nongshim bynta ba kongsan bad ka komiti ka trei shitom ban pyndep ïa ka kam bad ïa ki jinglap jong ka yn aiti sha ka komiti ba la thaw da ka tnad pule-puthi ka Sorkar Pdeng.
“Nga ngeit skhem ba ka bha ka miat jong ki samla pule ka dei ka jingsngewkhia kaba hakhmat eh. Kum ka skulbah, ngi don ban pynroi bad pynkupbor ïa ki samla pule jong ngi, bad nga pyntikna ba man ka rai ba la shim ha kane ka por kan buh hakhmat eh ïa ki jingmyntoi jong ki,” u la ong.
Shuh shuh u la kyrpad ïa baroh ki dkhot jong ka imlang-sahlang ka NEHU ban ïawan lang, ban buh sharud ïa ki jingïapher, bad ban pynleit jingmut ha ka thong ka jingïatylli ban tei ïa ka jaka pule kaba roi ba kiew.
“Ngi dang bteng ban leh katba lah ha la ka bor ban pyntikna ba ki samla pule kin ym shah ktah bad ba ka jingpule lem bad ka lawei jong ki kan ïoh ka jingïada,” ong u VC ‘In-charge’.
