Shillong, Naiwieng 18
Wat hadien ba u President ka Hynñiewtrep Integrated Territorial Organisation (HITO), Bah Donboklang Dkhar, u la pyrshah jur ïa ka jingthmu jong ka Sorkar Jylla lyngba ka tnat ki kam jngohkai pyrthei ban pynlong ïa ka tamasa ‘Cherry Blossom’ ha u snem 2022, hynrei hadien 2 snem kynthih pat kata ha kane kajuh ka tamasa kaba la pynlong mynta u snem 2024, la sakhi ba utei ujuh u nongïalam u la leit ban ïashimbynta ha katei ka tamasa da kaba shad bad rwai kmen lang.
Ïa kane ka jingleit ïashimbynta jong u President ka HITO ha katei ka tamasa, la sakhi ha kawei ka durkhih kaba la saphriang ha ki rynsan ‘social media’ ïa kaba la pyni shai kdar ba une u nongïalam u la ïashad bad ïakmen lem hajan ka rynsan ïaput-ïatem jong ka tamasa ‘Cherry Blossom’ kaba la long ha ka 15 tarik u Naiwieng 2024 ha Madan Kurkalang Bhoirymbong wat hadien ka jingpyrshah jong u ïa kane ka tamasa ha u snem 2022.
Halor kane, haba ïakren bad u Bah Donbok Dkhar ha ka 18 tarik u Naiwieng 2024, u la ong ba ka jingleit jong u sha katei ka tamasa ka dei kaba u la leit hi kum u ‘riewshimet ym kum u nongïalam ka seng bad ong ba katei ka jingthad bad pynsaphriang ïa ka durkhih jong u, ka dei tang ka kam bishni kaba la leh da ki katto-katne ngut ki briew kiba don ka jingïadei kaba ïajan bha bad ka seng saiñ pyrthei kaba ju ïatyngkhuh bad ka HITO na ka por sha ka por.
“Nga leit kum uta u ‘riewshimet bad nga khlem leit kum uta u HITO namar nga khlem phong ‘uniform’ ruh, hynrei ngan shu ong ïa u paidbah ba kato ka dei ka kam bishni bad ka kam jong ki katto-katne”, ong u Bah Donbok.
U la ong ba ka durkhih kaba la saphriang ka dei kaba la shna da ki briew ïa kaba u la kren 2 snem mynshwa kata ha u snem 2022, ha kaba u la kren halor ka jingpyrshah jong ka seng ïa ka jingthmu jong ka Sorkar Jylla ban wanrah bad pynlong aiñ ïa ka kam khalai hapoh ka Jylla ne ka ‘Casino’ ha kaba na ka liang ka seng ka la byrngem ïa ka Sorkar ba lada kam pyndam mardor ïa katei ka aiñ, ka seng kan shim da ki lad ki lynti ban khanglad ïa ka jingthmu ban pynlong ïa katei ka tamasa bad ka dei ha utei u juh hi u snem ba ïa ka tamasa ‘Cherry Blossom’ pat la pynsangeh noh ban pynlong namar ka jingjia shah siat ïap ki briew ha ka shnong Mukroh.
U Bah Donbok u la ong ba na ka liang ka seng ka ju pynshlur ïa ki samla bad ki khynnah ba kin leit ban ïashimbynta ha kum kitei ki tamasa khnang ba kin lah ban ïoh ïa ki jingjop ha ki rynsan ïakob bapher-bapher. Nalor nangta u la pynshai ba ka seng ka la pyrshah thik tang ha u snem 2022 ban khanglad ïa ka jingthmu ka Sorkar ban wanrah ïa ka ‘Casino’ hynrei ka khlem pyrshah pat ïa katei ka tamasa ha ki snem kiba bud namar kiba bun ki paidbah khamtam ki paidbah ka Bri u Hynñiewtrep ki ïoh ban ïashimbynta ha katei ka tamasa da kaba die jingdie nalor kiwei-kiwei ki kam kamai jakpoh.
U la ong ba baroh ki don hok ban ïashimbynta ha kino-kino ki jait tamasa bad kam mut ba tang lada dei u nongïalam seng um don hok shuh ban don bynta ne ban shah khang ban leit sha kum kitei ki tamasa.
“Kane ka dei tang ka kam buitpoh jong kano-kano ka seng saiñ pyrthei kaba shun bad isih ïa ngi khnang ba ngin ym lah ban kdew-kti bad ba ka la jan ruh ka ilekshon MDC namar mynha kane dang shen, ngi la kren ba ngin mih ban pyrshah biang lada ka Sorkar ka dang ïalehkai bad u paidbah”, bynrap u Bah Donbok.
