Shillong, Naiwieng 19
Ka Sorkar Jylla ha ka Lah Sngi U Blei ka la khot ïakren ïa ka MSSASA, Sengkmie halor ki jingeh ba ïadei bad ki nonghikai SSA ha kylleng ka Jylla.
“Ha ka 3 tarik u Risaw mynta u snem, ngi la wan buh ïa ka jingthoh sha ka Sorkar halor ka rai kaba la shim ha Madan Student – ban ai por 2 bnai ïa ka Sorkar ban wanrah ïa ka mat treikam kumno ban pynskhem ïa ka kam ki nonghikai SSA,” ong u President ka MSSASA, Bah Aristotle Rymbai haba kren sha ki lad pathai khubor hadien ka jingïalang.
Ka Sorkar ha kane ka sngi ka la khot lang ruh ïa ka AMSSASTA bad ka All Meghalaya 4th Teachers Association sha ka miej ïakren.
U Bah Rymbai u la ong ba ka seng ka la la aiti ïa 8 tylli ki jingai jingmut sha ka Sorkar kiba ka seng ka la dep ai naduh ba la ïashong bad ka State Education Commission (SEC) haduh ka jingïakynduh bad u Myntri ka tnad pule-puthi ha u Risaw bad ka jingïakynduh bad u Myntri Rangbah ka Jylla.
Halor ka jingai jingmut ban wanrah jingkylla ha ka Meghalaya School Education Service Rule, u la ong ba nalor ka jingpynjlan ïa ka rta ki nonghikai SSA, ba kin ïoh lad ban thep kam Sorkar – LP, UP, Secondary bad Higher Secondary, ka seng ka la ai jingmut ba dei ruh ban wanrah ïa ka mat treikam ba kan ai ïa ka jingbhah kyrpang haba ïadei bad ki kam ba lait nangne shakhmat.
“Ngi la ai jingmut ba dei ban ai 70% ïa ki nonghikai SSA kiba don ha ka kam bad 30% lyngba ka ‘Direct/Open Recruitment’ kumba ju leh baroh shi katta,” u la ong.
Haba phai sha ka jingpynskhem kam ïa ki nonghikai, u President u la ong ban pynskhem shisien pynskhem ïa ka kam ki nonghikai yn ym lah, bad ka seng ka la ai jingmut ba dei ban bynta ïa kane ha ki saw bynta.
“Ngi la ai jingmut ba ha ka bynta banyngkong dei ban buh ïa kiba la long ‘Qualified’ katkum ki kyndon ka NCTE jong ka 23 tarik Nailar, 2010. Ka ba-ar pat ngi la ai jingmut ba ïa kito ki nonghikai SSA kiba pynïasoh ha lane shuwa ka 23 tarik u Nailar, 2010 bad kito kiba pynïasoh ha lane shuwa ka 29 tarik u Naitung, 2011 kiba la biang ka ‘Academic Qualification’ bad ‘Professional Qualification’ bad ki bym donkam ban pyndep ïa ka MTET,” u la ong.
Ha kajuh ka por u la ong ba ka ka seng ka la ai jingmut ruh ba ka balai kan long ïa ki nonghikai SSA kiba dang pyndep tang ïa ka ‘Academic Qualification’ bad ‘Professional Qualification’ bad ki bym pat dep ïa ka MTET.
“Ka basaw pat ngi ai jingmut ba ïa kito ki nonghikai SSA ki bym pat pyndep ïa ka ‘Professional Qualification’ (Dl.Ed ne B.Ed) bad ki bym pat pyndep ïa ka MTET,” u la ong.
Shuh shuh u Bah Rymbai u la bynrap ba ka seng ka la ai jingmut ïa ka Sorkar ban pyllait ïa ki nonghikai SSA (kiba don ha ka kam) kiba pynïasoh ha lane shuwa ka 23 tarik u Nailar, 2010 bad kito kiba pynïasoh ha lane shuwa ka 29 tarik Naitung, 2011 na ka eksam MTET namar katkum ki kyndon ka NCTE (23 tarik Nailar, 2010) ha ka ‘para’ ba 4 bad 5, la thoh shai ba kino-kino ki nonghikai kiba pynïasoh ha lane shuwa ka 23 tarik Nailar, 2010 kim donkam ban pyndep ïa ka eksamin TET.
