Mairang, Naiwieng 19
Ka ophis u Assistant Registrar jong ki Co-operative Society, West Khasi Hills District, ryngkat lang bad ka ophis u Sub Registrar jong ki Co-operative Society, South West Khasi Hills District, Meghalaya Co-operative Apex Bank (MCAB) bad ka DPMU MBMA, ha ka 18 tarik mynta u bnai ki la ïoh ban rakhe ïa ka All India Cooperative Week kaba 71.
Ïa katei ka jingïalang la pynlong ha Tirotsing Memorial Hall, Pyndengumiong, Mairang, halor ka phang “Ka jingpynkhlaiñ ïa ka jingïatreilang hapdeng ki seng treilang” ha kaba ka Deputy Commissioner ka Eastern West Khasi Hills District ka Mitali Chandra ka la long kum ka kongsan, katba ka Kong A Lyngdoh kaba dei ka Deputy Registrar of Co-operative Societies, Tura ka la long kum ka symbud kongsan.
Kiwei ki ‘riew pawkhmat kiba la ïadonlang ki kynthup ïa u Bah K Khongjoh, Assistant Registrar of Co-operative Societies, West Khasi Hills bad ki ophisar na ka MCAB, NABARD, bad ka DPMU/MBDA.
Ka Mitali Chandra haba kren kum ka kongsan ha kane ka sngi ka la ban jur ïa ka jingdonkam jong ki seng treilang ban kyrshan ïa ki shnong ki thaw bad ban kyntiew ïa ka roi ka par ha baroh ki liang.
Shuh shuh ka la ong ruh ba ki seng treilang kim dei ki kompeni kiba thmu ban kamai hynrei ki dei ki seng kiba pynleit jingmut ha ka imlang-sahlang.
Ka Kong A Lyngdoh pat ka la pynpaw ïa ka jingkmen ban don bynta ha kane ka jingrakhe bad ka la ban jur ba ki Co-operatives ki don ka bynta kaba kongsan ha ka roi ka par jong ka ri India.
