Jowai, Naiwieng 19
Ka Jylla Assam ka la nang ïai bteng ïa ka jingkyntur pud sha ka shnong Mukroh kaba don hapoh Laskeiñ C&RD Block jong ka West Jaiñtia Hills District da kaba shna ïa ka surok thymmai na ka kyntoit Salang sha kyntoit Um-la-phiah kiba dang don hapoh u pud u sam jong ka shnong Mukroh.
Kane ka kam kyntur pud jong ka Jylla Assam ka la paw pyrthei ha ka jingphla jong u Waheh Shnong jong ka Shnong Mukroh u Ma Kitlang Maskut haba shim bynta ban pynsngew ïa ki jingeh jong ki ha ka jingïalang General Executive Committee jong ka Synjuk Waheh Shnong Ri Jaiñtia (SWRJ) ha Mihmyntdu ha ka 19 tarik Naiwieng mynta u snem.
U Ma Kitlang haba shim bynta ha ka jingïalang, u la ïathuh ba ïa kane ka surok thymmai ba la shna da ka Sorkar Assam ne da ka Karbi Anglong Autonomous Council (KAAC) la shna na khmat jong ka Assam Forest Beat House kaba dang hap u pud u sam jong ka Dorbar shnong Mukroh bad ka Assam ka sdang ban pynshna ïa kane ka surok ha ki taïew ba khatduh jong u Nailur mynta u snem.
U Ma Kitlang u la ïathuh ba ki nongshong shnong bad ka Dorbar Shnong Mukroh ki la pynpaw ka jingpyrshah halor katei jingkyntur pud da ka Assam namar kiba bun bah ki jaka rep jong ki nongshong shnong jong ka Mukroh kin shah knieh lut.
U la ïathuh ruh halor ka jingshah pyntieng pynsmiej bad shah pyndik jong ki nongshong shnong kiba leit rep leit riang bad ha man ba ki nongrep ki kit ïa u khaw u kba khamtam ïa ka dieng ïap ban thang ding kumjuh ban shna ïing hynrei ki shah khanglad bad ki shah daiñ kuna ha ki Assam Forest kiba buh ktem hapoh u pud u sam ka shnong Mukroh.
Halor kine ki jingeh baroh, u Ma Kitlang u la ïathuh ba ka Dorbar Shnong ka la dep ban pyntip mardor sha ki bor pynïaid District jong ka West Jaiñtia Hills kumjuh sha u CEM jong ka Jaiñtia Hills Autonomous District Council (JHADC) bad la kyrpad ïa ki ban pynsangeh noh ïa ka jingshna ïa katei ka surok thymmai.
U la ïathuh ruh ba ka Dorbar Shnong ka la kyntu ruh ïa ki bor pynïaid District ban buh ïa ki pulit Meghalaya hajan ka Assam Forest Beat House na ka bynta ban pynthikna ïa ka jingshngaiñ jong ki nongshong shnong ha ka por ba kit ïa u khaw bad kumjuh ban shimkhia ban ïakren bad ka Sorkar Assam ban ym pyndik haba kit ïa ki dieng thang ding.
Na ka liang ka Synjuk ka la kular ban shimkhia halor kane ka kam da kaba kan leit ban pynsngew sha ki bor Sorkar ban pynsangeh ïa katei ka jingshna surok.
