Shillong, Naiwieng 19
Ki kam thombor pyrshah ïa ki kynthei ki dei ki kam kiba la ju jia na ka por sha ka por. Wat hapdeng ka jingpynkhamti ïa ka kynthei da ki aiñ kiba tyngeh ban tehlakam ïa uno-uno u shynrang ban leh beiñ ne ban beiñ ïa ka hynrei kum kine ki jait kam pat ki dang ïai jia na ka por sha ka por.
Ha kawei ka jingjia kaba sngew pang mynsiem bad kaba sngew shyrkhei bha kaba la jia ha ka shnong Niriang kaba hap hapoh ka Thadlaskeiñ Block ha West Jaiñtia Hills District, ha kaba kawei ka longkmie ka la shah thang im ha la u jong u tnga u bym don shuh wat ïa ka mynsiem ïatiplem.
Katkum ka jingïoh jingtip ba la ïoh lum, katei ka jingjia ka la jia palat ïa ka shibnai tam hynrei ka la paw pyrthei tat haduh kine ki shisngi ne arsngi hadien ba ki la don ki briew kiba dei ki paralok jong katei ka longkmie kiba la leit ban wad ïa katei ka longkmie sha ïing jong ka namar ka jingjah kynsan, hynrei ha katei ka jinglap jong kitei ki briew, ki la shem ïa ka jingshisha ba katei ka longkmie ka la thiah pang ha ryngkat ki jingmynsaw kiba la jia na ka jingshah thang jong ka ha ka ding kiba long ishyrkhei haduh katta-katta khlem kino-kino ki lad ai jingsumar.
La ïathuh ba katei ka longkmie ka dei kaba dang don hapdeng ka 30 snem ka rta bad kaba don 6 ngut ki khun.
La ïathuh ruh ba ïa katei ka longkmie la pynkit noh dang shen sha Shillong Civil Hospital. Na ka liang u tnga jong kane ka longkmie pat u la pynkit biang ïa ka sha shnong ha ryngkat ka byrngem-byrsit ba kam bit satia ban ïathuh ïano-ïano halor kane ka jingjia lym kumta kan hap ban mad ïa ki jingjynjar.
Ynda katei ka longkmie ka la poi ha Civil Hospital Shillong ruh, na ka liang ki doktor ki la kylli pyrthew ïa ka halor ka jingjia hynrei ka la ïathuh ba ka la thang hi ïalade namar ki jingjia ïakynad bad u tnga jong ka.
Haba ïoh ban ïakren bad ki bahaïing-bahasem jong kane ka longkmie ha ka 19 tarik u Naiwieng 2024, ki la ïathuh ba kane ka jingjia ka la jia ha ka 26 tarik u bnai Risaw 2024 ha kaba u lok jong kane ka longkmie ba la tip kyrteng kum u Dahun Dkhar u la theh ïa ka da ka umphniang sharak bad bom da ka tyndong sliew dieng ïa ki kti jong ka bad hangta u la thang ïa ka.
Ki bahaïing ki la ïathuh ba ha ka por ba ki lap ïa katei ka longkmie, ki lap satang ïa ka met jong ka kaba khlem don shuh ki jaiñphong bad ka khlem ïathuh eiei satia sha ki ïa kaei kaba la jia ïa ka. Kumta na ka liang ki bahaïing-bahasem ki la shu phah sumar ïa ka ha ki nongsumar kiba ai dawai kynbat Khasi.
Ki la ïathuh ruh ba kane ka longkmie haba kylli ki doktor ka la ïathuh pynban ba ka la thang hi ïalade namar ka jingsheptieng ïa ki jingbyrngem jong u.
Na ka liang ka Kong Bhalang Suting kaba dei ka para jong kane ka longkmie ka la ïathuh ba ha ka por ba une u lok u la shoh ïa ka, kane ka longkmie ka dang bah ïa la i khun shadien bad ha ka por ba u thang ïa ka, ine i khun ruh i la ing lang na ka bynta jong ka khlieh.
Shuh shuh ki bahaïing ki la ïathuh ruh ba na ka por sha ka por u ne u lok u ju bom bad shoh ïa kane ka longkmie bad ki la ïathuh ruh ba ki la ïoh jingtip ba une u Dahun Dkhar u la leit ban aiti hi dalade sha ki pulit.
“U ju bom bad shoh ïa ka manla ka por hynrei kam ju nud ban ïathuh namar ka tieng ba u ju mlien ban byrngem ïa ka ban pynmynsaw ïa ki khun”, ïathuh ki bahaïing.
Hynrei kaba kham sngewlyngngoh halor kane ka jingjia bad kaba la buh ïa u dak jingkylli baheh ka long ba balei ki bor jong katei ka jaka ai jingsumar ha Civil Hospital Shillong ki la ailad ïa katei ka longkmie kaba don hapdeng ki jingmynsaw kiba jur ba kan leit phai sha la shnong khlem da shim ïa kino-kino jingujor hapoh ka Medico-Legal Case (MLC) halor kane ka jingjia.
