Shillong, Naiwieng 19
U samla Steve Jyrwa uba la ïoh ban rah ïa ka nam jop ha ka rynsan ïakob jong ka India’s Best Dancer Season-4, u la wan poi sha nongbah Shillong ha ka janmiet jong ka 19 tarik u Naiwieng 2024 ha ryngkat ka jingwan ban ai khublei ïa ki paidbah ka Jylla kiba la ai ka jingkyrshan ba radbah ïa u kat haduh ba un poi sha katei ka thong ha katei ka rynsan ïakob shad baheh jong ka Ri kaba la pynlong ha Mumbai ha ka 10 tarik u Naiwieng ha ryngkat ka jingïoh rah ïa ka song pisa kaba T.15 lak tyngka ryngkat bad ka kali.
Na ka liang ki paidbah ki la pynkhreh bad ap lypa ïa u samla Steve Jyrwa naduh na kad liengsuiñ ha Guwahati, ha ka jaka pynïeng bos ka Inter State Bus Terminus (ISBT) kaba don ha Mawïong ban pdiang burom bad ai khublei ïa utei u samla uba la wanrah ka nam bad burom ïa ka Jylla Meghalaya baroh kawei.
U Steve mar sien poi ha ISBT Mawïong, u la hiar napoh ka kali ba u la shong bad u la ai khublei ïa ki paidbah baroh kiba la ap bad pdiang burom ïa u.
Nalor ki bahaïing-bahasem, ki paidbah nongkyrshan kiba la pdiang sngewbha, la pdiang burom ruh ïa u samla Steve da u MDC ka Mawlai u Bah Teiborlang Pathaw uba la ai ïa ki jingai sngewbha sha une u samla.
U Samla Steve hadien ba mih na ISBT, u la leit beit-beit sha ka dong kaba u shong u sah kata ha ka shnong Nongmensong ha kaba kum ka shnong ruh ka la pynlong ïa ka jingïalang pynkup burom ïa une u samla uba la wanrah ïa ka nam bad ka burom ïa ka shnong bad ïa ka Jylla hi baroh kawei.
Ha kane ka sngi u MLA ka thaiñ, Bah A.L Hek u la pynkupburom ïa une u samla ka Jylla bad ruh ïa ki nonghikai jong u ha ryngkat ki bahaïing-bahasem kiba la lah ban pynmih ïa u khlur ba mihkhmat ïa ka Jylla.
U Bah Hek u la ong ba ka jingjop jong u samla Steve Jyrwa kam dei ka burom tang ïa u shimet ne ïa ka ïing-ka sem hynrei ka dei ka burom wat ïa u ruh kum u nongmihkhmat ka thaiñ bad ka dei ruh ka jingjop jong ka konstitwensi hi baroh kawei bad ïa ka shnong Nongmensong.
“U la wanrah burom ïa ka Jylla Meghalaya da kaba lah ban jop syndon kat ïa ka jingïakob shad kaba heh hapoh ka Ri India bad kane ka long shisha ka jingsarong ïa ka Jylla baroh kawei”, bynrap u Bah Hek.
U la ong ruh ba kum u nongmihkhmat lane ki nongmihkhmat baroh ki dei ban don beit ka mynsiem ban kyrshan bad kyntiew ïa ki khynnah samla ha kano-kano ka bynta ruh khnang ban lah ban wanrah ïa ka burom jong ka Jylla.
Nalor ka jaka ba la pynkhreh ïa u Steve Jyrwa, u Bah Hek u la ïathuh ruh ba u samla Steve u la leit ban ïakynduh sa ïa u Lat ka Jylla, u CH Vijayashankar namar ka jingkwah eh jong u Lat ban ïakynduh ïa une u samla.
Hadien kane ka jingshah pynkupburom ha ka Dorbar Shnong, u Steve Jyrwa u la leit sa sha ka jaka kaba la pynkhreh kyrpang kaba don ha Polo ha ryngkat ka jingpynkhreh ban ai ïa ki jingshad jong u sha ki paidbah nongkyrshan.
Da ka jingthrang bad jingangnud jong ki ba bun ba lang ban ïohi ïa ka jingshad jong une u samla, u Steve Jyrwa u la pyni ïa ka sap shad jong u Polo ha kaba u la shad ruh da ka jingrwai Khasi kat haduh kiba wan peitkai ïa u ki la shongshit beit puk ha ryngkat ka jingpynpaw ïa ka jinghun jrut ka mynsiem ban ïoh sakhi da la ki jong ki khmat ïa ka jingtbit shisha jong u Steve Jyrwa.
