Shillong, Naiwieng 20
Hadien ka jingmih ki jingkynnoh ba na ka liang ka jaka ai jingsumar ha Civil Hospital Shillong ka khlem shimkhia satia ha kaba ïadei bad ka jingshah thang jong ka longkmie na ka shnong Niriang kaba hap hapoh ka Thadlaskeiñ Block ha West Jaiñtia Hills District ha la u kurim kaba la jia ha ka 26 tarik u Nailur ban ujor pyrshah ïa utei briew bad pynngat ïa kane ka jingjia hapoh ka Medico-Legal Case (MLC), ka la pynlong ïa ka National Commission for Women (NCW) bad ka Meghalaya State Commission for Women (MSCW) ban leit sha katei ka jaka ai jingsumar ha ka 20 tarik u Naiwieng 2024 ban pynlong syndon da ka jingïalang hapdeng ki doktor bad ki bor ba halor jong kane ka jaka ai jingsumar ban kylli pyrthew halor kane ka jingjia.
Katei ka longkmie kaba la ngat ha katei ka apot ka dei ïa kaba la tip kyrteng kum ka Kong Wompher Suting kaba don 6 ngut ki khun. Na ka liang kane ka longkmie ka khlem ïathuh satia hano-hano ruh ïa ka jingdonkti jong u lok ban leh ïa katei ka kam namar ka jingtieng ïa ki jingbyrngem-jingbyrsit jong u. Dei tat haduh kine shisngi-arsngi ba ka la phla ha la ki jong bahaïing-bahasem ïa ka jingdonkti u lok ban thang ïa ka hynrei uba la phah pat ïa ka ba kan thok bad ong ba ka la thang hi ïalade.
Haba kren sha ki lad pathai khubor hadien ka jingïalang kaba la shong, u Dr. C Wanniang, Surgeon u la ïathuh ba katei ka jingjia ka la jia ha ka 26 tarik u Nailur 2024, bad na ka liang u kurim u la wan ban pynkit ïa katei ka lok sha ka jaka ai jingsumar ha katei ka jaka sumar ha ka 7 tarik u bnai Risaw 2024 ha ka por kumba 4 baje janmiet hynrei u ba la wan ban sei noh pat ïa ka na katei ka jaka ai jingsumar ha ka 1 tarik u bnai Naiwieng 2024. Pynban dei tat haduh hynnin ka sngi ka 19 tarik u Naiwieng 2024, na ka liang ki bahaïing-bahasem ki la wan ban pynkit biang ïa katei ka longkmie sha katei ka jaka ai jingsumar.
U Dr. Wanniang u la ïathuh ba katei ka longkmie ka la ing bad mynsaw jur bha ha ka por ba ka la wan poi ha katei ka jaka ai jingsumar ha kaba ka la ing kumba 45% ka met kaba kynthup naduh ka durkhmat, ki kti, ki kjat, ka bynta shajrong jong ka kpoh, u ryndang, ka met shadien bad ki la don shibun bha ki jingmynsaw na kiba bun ki bynta.
U la ïathuh ba katei ka longkmie ka la thiah kumba shibnai hapoh katei ka jaka ai jingsumar hynrei hadien kata kam treh satia ban shah ïa kino-kino ki jingai jingsumar hynrei ka la kwah ban leit beit noh sha shnong wat la na ka liang katei ka jaka ai jingsumar ki la pynbor ïa ka ba kan thiah bad sumar shwa ha katei ka jaka.
“Hadien ka shibnai, kane ka longkmie kam treh ban shah sumar ne ban tah dawai ne wat ban shah ai dawai injek hynrei ka la kyrkieh ban leit phai noh sha ïing bad wat la na ka liang jong ngi, ngi la pyrshang ban pynbor ïa ka ba kan thiah shwa khnang ba kan ïoh ïa ka jingshah sumar kaba paka hynrei kam treh satia, kumta la hap ban pyllait noh ïa ka na kane ka jaka ai jingsumar”, ong u Dr. Wanniang.
Haba kylli, hato na ka liang ka jaka ai jingsumar ka la dep ban ujor ïa katei ka jingjia hapoh ka Medico-Legal Case (MLC)? U Dr. Wanniang u la ong ba la dep ban pyntip ïa kane ka jingjia sha ki bor pulit ha katei kajuh ka sngi ba la wan ban pynkit da u lok jong ka hynrei ka dei ka mon jong katei ka longkmie hi kaba kwah ban mih noh na katei ka jaka hadien shibnai ba ka la thiah pang ha katei ka jaka. U la ong ruh ba ka jingbym ïathuh hok jong ka halor ka jingjia ka la pynlong pat ïa katei ka jaka ai jingsumar ba kan shim beit ba ka dei ka jingjia ïa kaba la leh hi dalade.
Na ka liang ka Kong Delina Khongdup kaba dei ka dkhot ka National Commission for Women (NCW) ka la ïathuh ba utei u kurim jong katei ka longkmie u la theh shwa da ka umphniang sdieh dohkha ïa ka bad hadien kata pat, u la sangah ïa katei ka longkmie ha ka kynroh haduh ba kam tip briew shuh bad nangta pat, un sa kynshoit da ka umphniang sharak bad thang shi syndon ïa ka.
