Jowai, Naiwieng 20
U Myntri Rangbah ka Jylla Conrad K Sangma ha ka 18 tarik u la aiti ïa ka cheque kaba T.6, 07,336 sha u Dr. HH Mohrmen Secretary ka Society for Urban and Rural Empowerment (SURE) ha shlem treikam u Myntri Rangbah ka jylla.
Kane ka pisa lyngba ka Chief Minister’s Special Development Fund 2024-25 (NGO Category) ka long na ka bynta ban thied kali ïa ka Halfway Home, Jowai kaba don ha Sabahmuswang, West Jaiñtia Hills kaba la plie paidbah ha ka 28 tarik Jylliew 2023.
Ka Halfway Home, ka dei ka projek kaba la pynïaid da ka Society for Urban and Rural Empowerment (SURE), ka ïing sah na bynta kiba nongpang kiba shah ktah ha ka jingmut jingpyrkhat, ki bym donkam shuh ban shah sumar ha ki jaka sumar, ki bym don ïing don sem, lane ki bahaïing bahasem kim pdiang shuh ïa ki.
Lah ban pynkynmaw ba ka Halfway Home ha Jowai ka la lah ban pynïakynduh ïa ki ar ngut ki nongpang na katei ka ïing sha la ki jong ki jong ki bahaïing bahasem.
Ka Halfway Home ka dei tang ma ka napdeng ki saw tylli ha ka jylla ba la kyrshan da ka Directorate of Social Welfare, Shillong, kaba la lah ban pynurlong ïa kane ka thong. Ïa kane ka Halfway Home la mihkhmat da ka Project Coordinator ka Kong Niwanka Shylla bad Social Worker ka Kong Ilasiewdor Gashnga.
Ha kane ka sngi la donlang ruh u Dr. H Niang, BDO jong ka Thadlaskeiñ. U Myntri Rangbah u la ai khublei ïa ki nongtrei bad NGO kaba la ai ka jingshakri kaba kordor ïa ka jylla, da kaba kitbok-kitrwiang ruh ba kin dang ïai bteng ban jop ha ki por ban wan.
Ka SURE ka la ai sngewbha ruh ïa u Myntri Rangbah da ka kot ‘Bam Tynre’ kaba thoh ïa ki katto-katne ki jingbam tynrai kiba la pynkhreh da ka Society.
