Shillong, Naiwieng 20
Uwei u rangbah uba dei u nongshong shnong ka dong ha East Khasi Hills, u la shah thok pisa palat lak tyngka ha uwei u briew uba kam ïalade kum u nongtrei jong ka kompeni ‘Flipkart.
Katkum ka khubor kaba la ïoh na ki pulit la ong ba une u rangbah uba la shah thok pisa, u la ai ka jingujor ba ha ka 21 tarik Nailur, 2024, u la ïoh pdiang ïa ka ‘phone call’ ka bym don kyrteng, ha kaba u briew ba phone u la pynithuh ïa lade kum u Executive jong ka ‘Flipkart’ bad bthah ïa u ban siew T.1,999/- online, na ka bynta ka tiar kaba u la ‘ordered’ na ka Flipkart, ïa kaba une u rangbah u la kohnguh.
La ong ba kham hadien, utei u briew ba kam nongtrei ka Flipkart u la phone biang ban pyntip sha u, ba u khlem ïoh pdiang ïa ka pisa namar ki ‘technical issue’ bad pyntip sha u ban siew biang sa shisien.
Hadien katto-katne por, une u briew u la pyntip ba u la ïoh pdiang ïa ka pisa kaba la phah baroh arsien bad kumta u la bthah ïa une u rangbah ban ai ïa ki jingtip kiba ïadei bad ka bank account ka jong u, khnang ba un ïoh ban pynphai noh ïa ka pisa kaba u la siew tam. Kham hadien na ka liang utei u rangbah ba la ai jingujor, u la lap ba ka la don ka jingsei pisa haduh arsien na ka bank account jong u khlem ka jingtip ka jong u kaba long T.43 hajar bad T.90 hajar.
