Shillong, Naiwieng 20
Ki nongïalam ka NEHU Students’ Union (NEHU SU) bad ka KSU-NEHU Unit ha ka Sngi Balang ki la rai ban sangeh shuwa shipor ïa ka jingïakhih shah thngan bad ban ap shuwa ïa ka kaiphod jong ka komiti kaba la thung da ka tnad pule-puthi ka Sorkar Pdeng.
“Da kaba buh jingmut ïa ka jingkyrpad ki nonghikai, nongtrei, ki doktor bad katkum ka jingai jingmut ka tnad ka koit ka khiah, ngi la sakhi ba ka koit ka khiah jong ki samla pule bad ki dkhot kiba don hapdeng ka jingïakhih shah thngan mynta la 16 sngi – ka koit ka khiah ka la sdang hiar, kumta ka KSU-NEHU Unit bad NEHUSU ngi la rai ba ngin sangeh shipor ïa kane ka jingïakhih shah thngan,” ong u President ka NEHUSU, samla Sandy Sohtun.
Ki samla pule ka NEHU ki la don hapdeng ka jingïakhih shah thngan hakhmat ophis treikam u Vice-Chancellor (VC), Prof. Prabha Shankar Shukla (uba don hapdeng ka jingleit shuti) naduh ka 5 tarik mynta u bnai ban dawa hiar shuki ïa u (VC) kumjuh ban weng ïa u Registrar bad Deputy Registrar nalor kiwei kiba la shah kynnoh thung kam be-aiñ ha ka skulbah.
Ha kawei ka liang, u President u la pynshai ba kane kam mut pat ba yn pynkut noh ïa ka jingïakhih hynrei ka jingïakhih kan bteng ha ki sngi poh-ïa naduh 9 baje mynstep haduh 5 baje janmiet bad kin ym khih na katei ka jaka tad haduh ban da pynurlong ïa ki jingdawa jong ki.
“Ngin ïai ap ïa ka kaiphod na ka komiti ba la thung da ka tnad pule-puthi ka Sorkar Pdeng…hynrei lada ka tnad pule-puthi ka Sorkar Pdeng ka pulom ban pynshitom katkum ka kaiphod jong ka komiti ka ban sa phah, ngin sdang biang ïa ka jingïakhih shah thngan ne shim ruh ïa kiwei ki sienjam,” ong u samla Sohtun.
Ha kajuh ka por, u la pynpaw ka jingkyrmen ba ki nonghikai kynthup ki nongtrei bad khamtam ki samla pule kin kyrshan lang ïa ki tad haduh ban da urlong ki jingdawa.
Kum ban shu pynkynmaw, ka tnad pule-puthi ka Sorkar Pdeng ha ka Sngi Palei ba la dep ka la thung ïa ka ‘Inquiry Committee’ ban tohkit halor ki kynrum-kynram bad ki jingkynnoh ba ka don ka jingpynïaid bakla bad ka jingbym biang ka rukom pynïaid hapoh ka NEHU, Shillong.
“Kumba phi ïohi, u VC u long uba kuman hynrei ngi ki samla pule ngim kwah ban bud ïa ki dienjat jong u, kumta nga kum u nongïalam nga sngew ba ïa mynta shipor ngin shong jahthait bad ap ïa ka kaiphod na ka komiti bad kumba nga la ong mynne, lada ka tnad pule-puthi ka Sorkar Pdeng kam shim ki sienjam kiba dei, ngin ym sngap jar bad ngin pynsawa jam ïa ka sur bad ïeng skhem ha ka nongrim bad ka rai jong ngi,” u la ong.
Shuh shuh utei u nongïalam u la pynpaw ka jingsngewnguh sha baroh ki samla pule, NEHUTA, MeTTA, KSU-Sengkmie, ka kynhun doktor kaba la don naduh ba sdang ka jingïakhih bad kiwei-kiwei.
“Nga kwah ai khublei ruh ïa ki dkhot jong ka imlang-sahlang kiba la don hangne naduh ka sngi banyngkong bad nga kwah ong ruh ba ka long kaba eh ban long nongïalam, nga sngew kum ban ïam na kawei ka sngi sha kawei pat haba nga ïohi ïa ki dkhot kiba leit sha hospital bad ïoh ‘drip’ na ki sngi sha ki sngi…ka pynpait ïa ka dohnud jong nga,” ong u President ka NEHUSU.
