Shillong, Naiwieng 20
Ka Meghalaya bad Assam ki hap ban pyndep noh ïa ka jingbuh dak ïa u pud u sam ha ki 6 tylli ki jaka kiba la dep mynjur ban pynbeit pud bad dei ban pyndep noh ka jingbuh dak ïa u pud u sam ha Tarabari, katba ha Hahim hap ban pyndep noh ban sieh mawpud hapoh u Nohprah.
Ki kam ban jurip bniah ïa ki jaka bad ban buh dak ïa u pud u sam bun kiba la jan dep bad ki don kiba la dep.
Dang shen ha ka jing-ïakynduh ha Guwahati, u Home Secretary ka Sorkar Pdeng u la ïakynduh ïa ki Chief Secretary ka Meghalaya bad Assam ban phaidien halor ki jaka kiba la dep mynjur ban pynbeit pud ha kaba ki Sorkar Jylla ki dei ban ai ka jingïatreilang bad ki kynhun kiba leit ban jurip bniah (survey team) ïa ki jaka ban buh dak ïa u pud u sam.
Haba ïakren bad u Chief Secretary ka Jylla, Bah DP Wahlang, u la ong ba la donkam ban pyndep noh ïa ka jingpeit bniah bad buh dak ïa u pud u sam ha Tarabari hynrei ka don kawei ka shnong kaba dei ban don ha Meghalaya kaba dang hap ban ïakren pynbeit kham shalor.
U la ong ba ha kiba bun ki jaka la pyndep ïa ki kam kiba donkam, bad ynda la dep na Tarabari, ka kynhun jurip bniah kan leit ruh sha Hahim ban pyndep ïa ki kam kiba dang sah.
Haba ïadei bad ki jaka ha Khanapara, u Chief Secretary u la ong ba ki kam hangne ki kham shem jingeh bad kham shim por namar hap ban peit ïa ki jaka puta jong ki riewshimet namar ki don kiba kwah ban don ha Meghalaya bad ki don ruh kiba kwah ban don ha Assam.
Ki 6 tylli ki jaka ïakajia pud kiba la mynjur ban pynbeit noh ki long ka Tarabari, Gizang, Hahim, Baklapara, Khanapara-Pillangkata, bad Ratacherra.
Na ka liang Union Home Secretary u la pynpaw ka jinghun ba ki Sorkar Jylla na baroh arliang ki la pynpoi sha ka bynta ban pyndep ban buh dak ïa u pud u sam ha Hahim ha kaba la bthah ruh ban pyndep noh sa ban sieh mawpud ha Hahim hapoh u Nohprah mynta u snem.
Shuh shuh ka Ministry of Home Affairs ka la ai jingmut ruh ïa ka Assam bad Meghalaya ban nang jam shakhmat ban pynduna ka jingïakajia ha ki 6 tylli ki jaka kiba dang sahteng ban pynbeit pud ha kaba la bynshet ha ki regional committee ban nang pynïaid ïa ki kam na baroh arliang.
Ki Regional Committee ki la ïoh por ban phah noh ki kaiphod haduh ka 31 tarik Nohprah, 2024.
