Shillong, Naiwieng 20
Ar tylli ki trok kiba kit dewbilat da ki spah byrni ki la shu jah rngai na shiteng lynti, naba ki khlem poi satia sha ka jaka ba ki dei ban leit pynhap ïa ka dewbilat.
Katkum ka khubor kaba la ïoh na ki pulit la ong ba u Krishna Kr Lama u la ai ka jingujor ba ha ka 19 tarik u Nailar, 2024 ha ka por kumba 5 baje janmiet, kawei ka trok kaba don ïa u registration number AS01-HC-9324 ïa kaba la ñiah da u Shahjamal Hoque ka la mih na M/s Goldstone Cement Ltd., kaba don ha Musiang Lamare ha East Jaiñtia Hills, kaba la kit haduh kumba 240 byrni ka dewbilat na ka bynta ban pynpoi sha Changsari, Guwahati ha Assam.
Hynrei la ong ba kane ka trok, haduh kane ka sngi kam shym la poi sha ka jaka ba ka dei ban poi bad wat ka mobile phone jong u nongñiah trok ruh ka la lip (switched-off).
Ha kawei pat ka khubor na ki pulit la ong ba u Dinesh Sharma ruh u la ai ka jingujor ba ha ka 22 tarik Risaw, 2024, kawei ka trok kaba don ïa u registration number WB35-D-7099 kaba la mih na M/s Star Cement Ltd., kaba don ha Lumshnong ha East Jaiñtia Hills, kaba la kit haduh 620 byrni ka dewbilat ban leit pynpoi sha Sihtlangpui, Lawngtlai ha Mizoram ka la shu jah rngai namar wat haduh kine ki sngi, ruh kam shym la poi satia sha ka jaka ba ka dei ban poi.
Ha kaba ïadei bad kane ka jingjia jah rngai jong kitei ki ar tylli ki trok, ki pulit ki la pynlong ïa ka jingtohkit ban wad shaei kine ki trok ki la shu jah rngai.
