Shillong, Naiwieng 20
Ka Voice of the People Party (VPP) jong ka 17-North Shillong konstitwensi ka la pynshai ba ka jingmih khubor ha ki rynsan lad pathai halor ki kyrtong MDC ha kine ki khyndiat sngi ba la dep ka long ka bym shisha hynrei ka long pynban ka jingïalam bakla ïa kiba bun balang khamtam ïa ki nongkyrshan hapoh konstiwensi.
“Hadien ka jingmih khubor ha ki rynsan lad pathai ba ki dkhot ka Constituency Committee jong ka VPP North-Shillong ki la pdiang bad mynjur ïa ka rai jong ka State Election Committee (SEC) ha kaba ïadei bad ki kyrtong MDC na Jaïaw -Mawprem bad Mawkhar -Pynthor – kam long kaba shisha bad kane ka jingpyllait khubor ka long pynban kum ka jingïalam bakla ïa kiba bun balang khamtam eh ïa ki paidbah nongkyrshan jong ka North-Shillong hi baroh kawei,” ong ka kyrwoh na u Vice-President bad Treasurer ka 17-North Shillong konstitwensi kiba la pynlong ruh ïa ka jingïakynduh lang jong ki para dkhot ha ka Sngi Balang ha ïingsah jong u Bah Mai Passah, Jaïaw Laitdom halor katei ka bynta.
Ki nongïalam ki la ïathuh ruh ba ïa ka jingïalang kaba la long ha ka 18 tarik mynta u bnai ha Jaïaw Pdeng Community Hall, la khot lyngba ka ‘WhatsApp Group’ jong ka Constituency Committee ha ka 17 tarik (mynmiet) bad la soi da u Bah V. Nongrum, Assistant Secretary bad ka ‘agenda’ ka long ban pyrkhat halor ka rai jong ka SEC.
Haba kdew ba ïa ka jingïalang ha katei ka sngi la pynïaid da u President ka North-Shillong bad jan baroh ki dkhot ka komiti ki la poi bad soi ïa ka bui thoh kyrteng, ki nongïalam ki la pynpaw ka jingkyndit bad jinglyngngoh ban ïohi ha ki jingpyllait khubor ba kitei kiba soi kyrteng, baroh ki dei kiba la pdiang bad mynjur ïa ka rai jong ka SEC.
“Kane ka long kaba bakla bad ka bym shisha – ka long pynban kum ka jingpyndonkam bakla ïa ki kyrteng jong kito kiba ym shym la mynjur ïa ka rai khatduh jong ka komiti ha katei ka sngi,” ki la ong.
Ha katei ka jingïalang, la ïakren bad ai jingmut halor shibun kiei-kiei khamtam haba ïadei bad kumno ban law ïa ki sohkyrdot kiba ka North Shillong konstitwensi ka mad bad ïakynduh ha kine ki sngi hynrei ïa kata ruh ym shym la treh ban pdiang.
“La don ruh kiba ai jingmut ba ha kaba ïadei bad kane ‘agenda’ ban rah bad pynskhem ha ka ‘General Meeting’ jong ka North Shillong ban ïoh ïa ka jingpynsngew, ka jingai jingmut na baroh, hynrei ïa kata ka jingai jingmut ruh, u Chairman ryngkat katto-katne ki dkhot kim shym la pdiang bad ong ba dei ban shim rai bad mynjur beit ha katei ka sngi (18 tarik) namarba ka la long kyrkieh shaba palat bad ym long shuh ban pynslem,” ki la ong.
Halor ka rai khatduh la ka ïing ka pdiang bad mynjur ne em ïa ka rai jong ka SEC na bynta ban pynskhem ïa ki kyrtong na kitei ki 2 tylli ki MDC konstitwensi, ki nongïalam ki la ong na ka liang u Chairman, u la phah pyni dak da kaba shu ïa rah kti ban tip kino kiba mynjur bad kino ki bym mynjur.
“Ha kata ka por, shiteng shiliang na ki dkhot kiba don ha kata jingïalang ki la ïa rah-kti ba ki pdiang bad ki mynjur hynrei shiteng shiliang na ki dkhot kim shym la rah-kti bad kane ka kdew shai ba kim hun, kim pdiang bad kim mynjur ïa ka rai jong ka SEC,” ki la ong da kaba bynrap ba kam shym don kano-kano ka jingphah soi kyrteng na u Chairman ban pyni ba baroh kiba don ha ka ïing ki hun bad mynjur ïa ka rai ka SEC, hynrei ka dei tang ka buit lyndet bad pynsngewthuh bakla lyngba ki rynsan lad pathai.
Shuh shuh kitei ki nongïalam ka konstitwensi ki kyrpad ïa baroh ki dkhot jong ka VPP North-Shillong, ki paidbah bad kumjuh ki nongïalam ka VPP-Sengkmie ba kim dei ban ngeit ne pdiang ïa ka jingmih khubor ha ki rynsan lad pathai bad kam shym don kano-kano ka jingsoi kyrteng na ka bynta ka jingshim rai.
“Kum ki dkhot kiba don ka jingkitkhlieh ïa ka 17-North Shillong konstitwensi, ngi kyrpad rit ïa phi ki nongïalam ka VPP ba phin ïaleh shitom ban pynkut noh ïa kane ka jingïapher jingmut khnang ba kan poi noh sha ka jingïasuk bad jingïasngewthuh jingmut,” ki la bynrap.
