Shillong, Naiwieng:
Kum shi bynta ka jingrakhe Audit Week 2024, la plie paidbah ïa ka rynsan e-Pension ba thymmai jong ka Ophis u Accountant General (A&E), Megha-laya da u John K Sellate, Pr Accountant General (Audit) bad Director General, Regional Capacity Building and Knowledge Institute, Shillong.
Ha ka jingai jingkren ha katei ka sngi, u Sellate u la ban jur halor ka jingkongsan jong kane ka sienjam ban wanrah ïa ka jingshai bad ka jingseisoh ha ka kam sam bai bam tymmen. Namar u la ong ba ka jingplie ïa ka rynsan bai bam tymmen ka long kum u mawmer ha ki jingpyrshang jong ka sorkar ban ai ka jingshakri kaba kham bha ïa kito kiba ïoh bai bam tymmen bad u la ong ruh ba ka sorkar ka ieng skhem na ka bynta ka jingpynsuk ïa ka kam bai bam tymmen bad ban pyllait katba lah ïa kane na ki kynjnit-kynjnat. Ka rynsan bai bam tymmen ka la treikam mynta bad lah ban pyndonkam ïa ka lyngba ka [https://epension.megonline.nic.in].
Ha katei kajuh hi ka sngi, u Bah C.H.Kharshïing, Pr Accountant General (A&E), Meghalaya u la plie paidbah ïa ka jingai jingshakri lyngba ki SMS kaba thmu ban pynsted ïa ka jingpynkhreh ïa ki kot ki sla na ka bynta ka bai bam tymmen jong ki nongtrei jong ka jylla kiba la dei ban shongthait noh.
Kane ka jingai jingshakri lyngba ki SMS, kamut ba katei ka tnat ba dei khmih ïa ka bai bam tymmen kan kan ai jingtip man u bnai sha baroh ki nongtrei jong ka jylla kiba la shongthait bad kin ïoh ruh ban ai jingtip haba ïadei bad ki kot- ki sla kiba ïadei bad ka bai bam tymmen. Kane ka sienjam ka dei kaba la saiñdur ban pynduna ïa ki jingpynslem lyngba ka jingïakren kaba kham bha hapdeng ka ophis AG bad kito kiba shong thait na ka kam.
Ha ka jingai jingkren, u Bah Kharshïing u la kdew ïa ka jingkongsan jong kane ka jingai jingshakri ban pynbha shuh shuh ïa ka kam ban pynshisha ïa ki bai bam tymmen. U la ong ruh ba ka jing wanrah ïa ka jingai jingtip lyngba ki SMS ka dei ka sienjam kaba heh na ka bynta ka kam bai bam tymmen kaba kham seisoh bad kaba kham pynsuk shuh-shuh ban pyndonkam. Namar kata u la ong ba ka tnat kan ïeng skhem ban ai ka jingshakri kaba biang tam ïa kito kiba la shong-thait na ka kam bad kane ka sienjam kan iarap ban pynurlong ïa kane ka thong.
Kane ka rynsan ka long ka sienjam kaba khraw ban ïoh ban kyntiew jingai jingshakri kiba ïadei bad ka bai bam tymmen na ka bynta ki nongtrei jong ka jylla bad la saiñdur ïa ka ban pynsuk ïa ki jingdonkam na ka bynta kito kiba la shongthait na ka kam, ki Ophis Treasurybad Drawing bad Disbursing, kiba plie lad ïa ki paidbah ba kin ïoh ïa ki jingtip shaphang ka bai bam tymmen, ban buddien ia ki jingbuh aplikeshon bad ban lah ruh ban ai ïa ki jingtip ha ka por kaba biang.
