Ngin sa ïakren ïa ka jingkynthoh u Bah Adelbert, hadien ka ilekshon MDC: Dr. Batskhem

Shillong, Naiwieng 20

U nongaiktien ka Voice of the People Party (VPP), Dr. Batskhem Myrboh u la ong ba ka seng kan sa shong pyrkhat hadien ba la kut ka ilekshon MDC ha KHADC bad JHADC la yn shim rai ne yn ym shim rai halor ka jingkynthoh u Bah Adelbert Nongrum, MLA ka North Shillong konstitwensi hadien ka jingbym hun ïa ka jingrai ïa ka tiket MDC ilekshon.

Haba ïakren bad ki nongthoh khubor ha ka Sngi Ba-ar, u Dr. Batskhem u la ong ba mynta ka dang don ha ka thma ban ïakhun ilekshon MDC, kumta kin nym pat ïakren eiei hynrei kin sa ïakren ynda la kut ka ilekshon.

U la pynkynmaw ruh ba la don ki dkhot ba la shah beh seng namar ka jingkren pyrshah ïa ka seng shwa ka ilekshon MP Lok Sabha bad hadien ka ilekshon ka seng ka shim ïa ka rai namar kam kwah ban pynbunkam haba dang ïaid ilekshon.

Ha kajuh ka por u la ong ba u Bah Adelbert u la ïaid lait na ka riti pynïaid kam jong ka seng haba ïadei bad ka jingjied ïa u kyrtong MDC namar khlem thoh ba hap da mynjur da u MLA haba jied kyrtong MDC hynrei ka bor ba khatduh ka dei jong ka State Election Committee bad la mynjur da ka State Executive Committee.

U Dr. Batskhem u la ong ba ka riti pynïaid kam (Constitution) ka dei ka jingïatehkular hapdeng ki dkhot bad ïa kine ki riti pynïaid kam la shim ïa ka rai ha ka jingïalang jong ka VPP ha u snem 2021 kaba la pdiang da ka Election Commission jong ka ri India.

U la pyntip ba ka State Election Committee ka mut wanrah ha ka 21 tarik Risaw 2024 ïa ka jingpynbna tiket ïa ka Jaïaw konstitwensi bad Mawkhar-Pynthorumkhrah konstitwensi hynrei namar ka jingkyrpad u Bah Adelbert Nongrum ban nym pat ïakren, la rah noh sha kawei pat ka jingïalang ha ka 8 tarik mynta u bnai.

“Haba ngi la wanrah ïa ki kyrtong, u Bah Adelbert u la ong ba kumno la jied kyrtong khlem da ïoh jingmynjur na nga u MLA hynrei ngi la ong ba ha ka riti pynïaid kam, ka khlem thoh ba hap ban ïaid lyngba u MLA namar kan buh jingeh ïa ka seng ynda la dei sa ka por pan tiket ha ka ilekshon MLA mano ban ai bor ban ai tiket lada pan tiket hi u MLA bad lada don sa ki MDC ruh kin sa buh jingkylli lang,” u la ong.

U la ong ba lada ki briew kiba bat ïa ka nongrim haba ki don ha ka seng ki dei ban ïada haba don kiba kylli jingkylli hynrei kaba sngewsih ka long ba ha jaka ban ïada, u Bah Adelbert u la mih sha ki lad pathai khubor ban kynnoh ba ka State Election Committee ka la ïaid lait bad ñiew beiñ ïa u.

U Dr. Batskhem u la pynshai ba kam don ban peit shi bahaïing haba ai tiket ha Jaïaw konstitwensi.

U la ong haba poi ha Jaïaw konstitwensi, ki dkhot kim shah ïa u Dr. Kara H Chen wat la u dei u Chairman ka State Election Committee ban ïakren ne don ha committee ban jied ïa u kyrtong hynrei la ïakren tang ki dkhot.

U la pynthikna ba u Denzil Chen u dei pyrsa jong u Dr. Kara H Chen hynrei la jied hadien ba la dep bishar bniah.