Nongpoh, Naiwieng 21
Hadien ar taïew jong ka jingpynlong ïa ki prokram bapher bapher kumno ban tyngkai bad pynneh pynsah ïa ka um kaba la sdang da ka NITI Aayog jong ka Sorkar Pdeng na ka bynta ki 20 tylli ki Aspirational District bad Aspirational Block ha ka ri hi baroh kawei kaba la sdang naduh ka 6 tarik Naiwieng, 2024, ki bor pynïaid jong ka Ri Bhoi District ha ryngkat ka jingïatreilang bad ka Jal Jeevan Mission, PHE bad kiwei kiwei, ha ka sngi Balang ki la ïoh ba pynkut noh da ka jingïalang pynhap pyrda ïa kane ka prokram kaba la tip kum ka Jal Utsav ha Parish Hall, Nongpoh.
Ha kane ka sngi, u Myntri ba khmih ïa ka tnat PHE ka Jylla, u Marcuise N Marak u la wan ban shimti ïa ka bynta kum u kongsan ha ka jingdon ryngkat u Deputy Commissioner ka Ri Bhoi, u Abhilash Baranwal, ka Chief Engineer ka tnat PHE Kong B Lyndem, ka Additional Deputy Commissioner ka Ri Bhoi, Kong Brenda L Pakyntein, u Executive Engineer ka PHE Nongpoh Division, Bah U Kurbah nalor ki nonghikai, ki khynnah skul, ki SHG bad ki nongïalam shnong ka thaiñ.
Kum shi bynta jong ka jingpynhap pyrda ïa kane ka prokram, la pynlong ruh ïa ka jingbam smai ban pynneh pynsah ïa ka um, ba la lamkhmat da u Abhilash Baranwal, Deputy Commissioner ka Ri Bhoi, ka jingsam ïa ki khusnam sha ki nongjop jong ki jingïakhun bapher bapher kiba la pynlong ha kine ki sngi bad taïew ba la dep kum ka Jal Utsav Run 7KM, ka Drawing & Painting, Essay & Slogan bad kiwei kiwei de nalor ka jingsam ïa ki tiar khmih ïa ka jingkhuid jong ka um (Field Testing Kits) sha ka shnong Iewmawlong, Mawdiangum, Pahamsyiem, Umlyngkdait bad Shangbangla.
Haba ai jingkren lamphrang ha kane ka sngi, u Abhilash Baranwal, u la pyntip ba ka prokram Jal Utsav, ka dei kaba la sdang da ka NITI Aayog bad pynlong ha ki 15 sngi lynter, kata naduh ka 6 tarik jong u bnai Naiwieng, 2024 haduh ka 20 tarik u bnai Naiwieng, 2024 ha ki 20 tylli Aspirational District bad Aspirational Block jong ka ri da ka jingïatreilang bad ka Jal Jeevan Mission bad kiwei de ki tnat treikam jong ka Sorkar da ka jingthmu ban pynshai bad pynsngewthuh ïa ki paidbah halor ka jingdonkam ban pynneh pynsah ïa ka um bad ki tyllong um.
Na ka liang jong u kongsan, u Marcuise N Marak u la pynpaw ïa ka jingsngewkmen ban ïadon bynta ha kane ka prokram kaba u la ong ba ka long kaba kongsan bad donkam haduh katta katta kaba ïadei bad ka um naba ka dei ka jingdonkam jong manla ki thliew ïing. U la pynpaw ruh ïa ka jingsngewkmen bad sngewnguh ïa ka Sorkar Kmie kaba jied ïa ka Ri Bhoi District kum kawei na ki 20 tylli ki Aspirational District ha ka ri ban pynlong ïa kane ka jait prokram kaba lah ban wanrah ïa ka jingkylla.
U Myntri u la ai ruh ka jingïaroh sha baroh ki tnat treikam Sorkar bapher bapher ba kynthup ruh naduh ki shnong ki thaw, ki SHG, ki nonghikai bad khynnah skul kiba la ïashim bynta shitrhem ha kane ka prokram ha kine ki khatsan sngi lynter ha kylleng ki bynta jong ka District bad pynpaw ruh lyngba ka jingkyrshan bad ïatreilang jong baroh ki paidbah, yn lah ban ïada bad pynneh pynsah ïa ka um bad ki tyllong um ha ki shnong ki thaw.
