Shillong, Naiwieng 21
U nongaiktien ka Bharatiya Janata Party (BJP) Meghalaya, Bah Mariahom Kharkrang u la kyntait ïa ka jingkynnoh jong ka seng Congress ba ka sorkar BJP ka la wanrah da u briew uba dei na ka RSS ha ka skulbah NEHU bad ha kiwei ki tnat Sorkar Pdeng.
“Kum kane ka jingkynnoh ka dei tang ka jingkren lamwir khlem nongrim haei-haei ruh bad ym dei ban shim khia than ïa kum kine ki jingkynnoh”, u la ong.
U la ong ba u Myntri ka BJP u la dep kren sha ki lad pathai ba kano-kano kaba jia ha NEHU ka la don ka jingtohkit bad kan wad ïa ka jingshisha baroh ha kaba ïadei bad ka jinglong jingman ha NEHU.
“Ailad ïa ka kynhun jong ka ‘fact finding committee’ ba kin pyndep ïa ka jingtohkit bad ban lap kaei kaba jia ha NEHU”, la ong u Bah Kharkrang.
U la ong ba ka BJP Meghalaya ruh ka la shim khia ïa kaei kaba la jia ha NEHU bad ki nongïalam ka BJP ha Delhi, bad bynrap ba ha ki sngi ban wan lehse ki nongïalam ka seng na ka Jylla kin leit ban ïakren ïa kane kaba jia ha NEHU bad ki nongïalam ha Delhi.
U la ong ba na Delhi haba ki thung ïano-ïano ha kano-kano ka kyrdan ki peit ïa ka jingtbit jong ki briew.
“Lada ka jia kumne ha NEHU kam long ka dak kaba bha, hynrei ka Sorkar kan sa shim kam noh wut-wut ban pynthikna ba ka NEHU kan lah ban treikam kumba ju long ha ki por ba la dep”, la ong u Bah Kharkrang.
Haba kylli, u Nongïalam ka BJP u la kyntait ïa ka jingkynnoh ba ka BJP ka pyrshang ban pynrung ïa ki rukom pyrkhat jong ka ha kiwei ruh ki tnat sorkar pdeng.
U la ong ba kum kine ki jingkynnoh ki dei ki bym don nongrim, bad kiwei ki seng saiñpyrthei kiba ïa pyrshah ïa ka BJP kin pyrshang ban ïohnong da kaba wanrah bun jait ki jingkynnoh, hynrei na ka liang ka BJP kan ym pynleit jingmut than ïa kum kine.
