Nongpoh, Naiwieng 21
Uwei u rangbah ba la tip kyrteng kum u Melan Syngkli na ka shnong Umkhawai kaba dang hap hapoh ka thaiñ Jirang, ha ka Sngi Palei u la shah kem noh ha ki bor pulit ka thanat Patharkhmah halor ka jingkynnoh ba u la byrngem ban leit siat ïap ïa u Bah Balwan Mawthoh bad kiwei kiba dei na kajuh hi ka shnong.
Katkum ka khubor ba la ïoh na ki bor pulit, la ïathuh ba ïa kane ka jingjia la ujor da u Bah Tarmal Mawthoh, uba la pyntip sha ki bor pulit ba ha ka 18 tarik mynta u bnai Naiwieng, 2024 ha ka por hapdeng 11 bad 12 baje eiei shiteng sngi, utei u Bah Melan Syngkli u la leit sha ka ïingsah jong u Bah Suntosh Marbaniang bad byrngem ban siat ïap ïa u Bah Balwan Mawthoh bad ruh ïa u Bah Suntosh Marbaniang bad ïa ka Kong Twilen Mawthoh da ka pistol kaba u don lada ki leit ban pyntip ïa katei ka jingjia sha ki bor pulit.
Tang mar shu ïoh jingtip halor kane ka jingjia, ki bor pulit mar-mar ki la pynlong ïa ka jingtohkit bad kem ruh ïa u Bah Melan Syngkli, 46 snem ka rta. Na ka met jong une rangbah la ïoh ban kurup ïa kawei ka pistol shna hi (country made pistol) kaba khlem laisen lem bad saw tylli ki kuli bym pat pyndonkam.
Halor kane ka jingjia, na ka liang ki bor pulit ki la pynrung da ka mukotduma pyrshah ïa utei u rangbah ha thanat Patharkhamh katkum ki kyndon 333/351(3) jong ka aiñ BNS lem bad ki kyndon jong ka 5(1A) (1AA)(1B)(a) ka Arms Act bad ka jingtohkit halor kane ka bynta ka dang ïaid shakhmat.
