Shillong, Naiwieng 21
Ka Hynñiewtrep Youths’ Council (HYC) Sengkmie ha ka Sngi Palei, ka la leit ban ïakynduh ïa ki bor pynïaid distrik jong ka East Khasi Hills District ban kyntu ïa ki ban bthah ïa ki nongpynïaid jong ki shnong ki thaw bad ki thanat pulit ba kin lum jingkheiñ ïa ka jingdon jong ki phetwir kiba wan na ka Jylla Manipur ban wan riehtngen sha kane ka Jylla.
Kum ban shu pynkynmaw hangne, ki phetwir na ka Jylla Manipur ki la wan ban riehtngen sha ka Jylla Meghalaya hadien ba la don ka jingïakynad bad ka jingïaumsnam hapoh katei ka Jylla hapdeng ki jaidbynriew Kuki-Zo bad Meitei kaba la sdang naduh mynshem snem.
Haba kren sha ki lad pathai khubor hadien ka jingïakynduh ïa ki bor pynïaid distrik, u President Bah Roykupar Synrem u la ong, ka jingleit ïakynduh jong ka seng ïa ki bor pynïaid Distrik ka dei ruh ban pynthikna ba kine ki phetwir kim dei ban ïoh ïa ki Election Photo Identity Card ne ki EPIC Card bad ba kim dei satia ban ïoh rung hapoh ka thup jong ka ‘Electoral Roll’ ban thep vote.
“Hooid, kum ki nongshong-shnong jong kane ka thaiñ shatei lam-mihngi ka Ri, ngi sngewkhia halor kane ka jingjia kaba la jia hapoh Manipur bad ngi sngewkhia ïa ki briew ba shong ba sah ha Manipur hynrei kum ka jaidbynriew pat, ngi hap ban sngewthuh na ka bynta ka jingbha jong ka jaidbynriew baroh kawei”, ong u Bah Synrem.
U Bah Synrem u la ong ba ka jingwan jong ka seng ha katei ka sngi ka long ruh ban wad jingtip ïa ka jingdon jong ki briew kiba la wan ban rung shapoh kane ka Jylla hadien ka jingïakynad hapoh ka Jylla Manipur bad ong ba hato na ka liang ki bor pynïaid distrik, ka Sorkar, ki thanat pulit, ki shnong, ki don ne em ïa ki jingkheiñ kiba biang khnang ba ynda ka la kut kane ka jingkulmar, ki dei ban leit phai noh sha la ka jong ka shnong.
U la ong ba ka mat ba ar ba ka seng ka la wan ban pynsngew ha ki bor pynïaid distrik ka long ba kine ki briew lada ki wan hapoh kane ka Jylla, kim dei ban aplai ïa ka EPIC Card ba kin long noh kum kita ki nongshong shnong bapura jong kane ka Jylla.
Shuh shuh u Bah Synrem u la ong ba na ka liang u Additional Deputy Commissioner u la pyntip ba katkum ka jinglum jingkheiñ kaba ka DC ophis ka la ïoh ban lum, ki don kumba 300 tam ngut ki briew kiba la wan ban shong bad sah hapoh ki shnong bapher-bapher jong ka East Khasi Hills khamtam ki shnong hapoh Madanrting, Laitumkhrah bad kumta ter ter bad ong ba kiba bun napdeng kine ki briew ki la leit phai noh sha ka Jylla Manipur hynrei ki don ruh pat kiba dang shong dang sah hapoh kane ka Jylla.
“Ka jingdawa jong ngi ka long ba na ka liang ka DC ophis ka dei ban bthah ïa ki shnong ki thaw bad ki Dorbar Shnong ba kin buh jingkheiñ bad wat ki thanat ruh ki dei ban don ïa ka jingkheiñ jong kine ki briew kiba wan khamtam eh na Manipur bad ynda la kut kane ka jingkulmar, ki bor pynïaid Distrik bad ki bor pulit ki dei ban pynthikna ba ïa kine ki briew dei ban phah noh sha ki shnong ba ki wan bad ban pynthikna ruh ba kim dei ban ïoh rung ha ka ‘Electoral Roll’, ong u Bah Synrem.
Halor kane ka bynta, u Additional DC u la pynthikna ha ka seng ba kitei ki briew kiba la wan poi na ka Jylla Manipur, kin ym ïoh bad ki khlem shym la ïohlad ban pynrung kyrteng hapoh ka ‘Electoral Roll’.
U Bah Synrem u la ong ba na ka liang ka seng ka dap da ka jingsngewkhia kaba jur bha halor kane namar naduh ba la sdang ka jingïakynad hapoh ka Jylla Manipur, ka jingwan rung jong u drok hapoh kane ka Jylla ka la nang jyllei bha ha kine ki sngi.
Kumta, na ka liang ka seng ka la kyntu ïa ki bor pynïaid distrik ba kin long kiba phikir bha ïa ka rung bad ka mih jong kine ki briew bad kyntu ruh ba kin bthah ïa ki trai jong ka jaka Cantonment Area ba kin lum jingkheiñ ïa ka jingdon jong ki briew kiba shong ba sah ha katei ka jaka bad kumjuh ban tehlakam ïa ka jingrung bad jingmih jong ki briew ha ki jaka ba ka Cantonment Area ka long trai namar kiba bun na ki birew kiba ka seng ka la ïoh ban kem drok ki dei kiba sah ha katei ka jaka.
