Shillong, Naiwieng 21
Ki nongñiah taksi ki la pynpaw ba ki la don ka jingmyntoi haba ki ïoh lad ban ïaid biang sa shisien napdeng surok kaba sah ki Harijan kaba don ha Them Ïew Mawlong. Hynrei kane kam pat wanrah jingshngaiñ namar haba ki Harijan ki ïalehkai hapdeng surok, ki nongñiah taksi ki hap ban kynriah hi ïa ki kali namar kim kwah shuh ban mih kano-kano ka huri-hura.
Ka jingbuddien u nonglum khubor ka dei hadien lai taïew duna ba la pynïaid ïa ki kali na ka surok ba shong ki Harijan kaba don ha Them Ïew Mawlong kaba la sdang naduh ka 4 tarik mynta u bnai Naiwieng 2024 hadien hynriew snem ba la khang ïa katei ka surok naduh ba mih ka jingïakynad kaba jur bha ha u snem 2018.
Ïa kane ka surok la shah ban ïaid ki taksi kamai bad ki bos Smit kiba ïeng ha Them Ïew Mawlong kata tang hapoh ka 4 baje janmiet.
Ki la ïathuh ba naduh ba ïaid na jaka sah jong ki Harijan, ka la duna ka jingdheng kali namar ka la sted ban poi sha Khyndailad hynrei lada leit ïaid na Pump Anjalee ka slem bha namar ka jingdheng kali.
Ki taksi kiba hap ïaid na jaka sah jong ki Harijan ki dei kito kiba kamai sha New Shillong, Laitumkhrah, Nongmensong, Pynthorumkhrah, Polo bad ki bos Smit, katba ki taksi kiba ïeng hajan ka Them Ïew Mawlong ki hap ban leit phai beit na Petrol Pump Anjalee.
Wat la ka Sorkar ka la shah ban ïaid ïa ki kali na Them Ïew Mawlong hynrei ki pulit ki dang ap pahara naduh ba sdang ka surok haduh ba kut ka surok ha jaka sah ki Harijan.
