Shillong, Naiwieng 21
U Rangbah Shnong Lumdaitkhla, Bhoirymbong, Ribhoi District u Bah Taiwel Sing Rympei u la ong ba ka jingpdiang ka shnong ban wan ka tamasa Cherry Blossom ka long ym tang ban kyntiew ïa ki jaka jngohkai pyrthei ha ka jylla hynrei ka jingmyntoi kaba nyngkong ka long ban kyntiew ïa ki kam jngohkai pyrthei ha ka thaiñ Eastern Ribhoi.
U la ong ki jaka jngohkai pyrthei ha kane ka thaiñ ki don kum ha Lumynken, Mawlyntaw, Mawiambei, Dwarksuid, kumta donkam ïa ki paidbah ban long kiba kylluid mynsiem ban pdiang ïa kiba wan jngohkai pyrthei khnang ban long ka lad aikam.
U Bah TS Rympei u la ai khublei ïa ki bor pynïaid district kiba la phah ki bor pahara ban pynlong ïa kane ka tamasa kaba ïaid beit.
Shuh shuh u la pyntip ba ka jingdheng kali ha ka 15 tarik mynta u Naiwieng 2024 kaba dei ka sngi sdang ka tamasa, ka dei namar ki don kiba ïeng kali khlem akor harud surok haduh ban dheng kali haduh ban da shai ka bneng ha ka step sngi Saitjaiñ.
U la pynpaw ka jingsngewkmen haba ki paidbah ka jylla bad ka ri India ki la ïoh ban sakhi da la ki jong ki khmat ïa ki nongrwai ba pawnam kum u Akon, Boney M bad Clean Bandit.
U la pyntip ba ka jingmyntoi ka shnong ka long ba ka Sorkar ka la ïoh ban pynbha ïa ka madan ha Lumdaitkhla ka la ker ïa ka madan bad ban siang rong ïa ki surok hapoh shnong bad kiwei de ki jingmyntoi na bynta ka thaiñ bad ka jylla baroh kawei.
Shuh shuh u la ong ba lada long biang lashem snem, ka shnong ryngkat ka bor Sorkar kan dang pynjanai ïa ka rukom ïeng kali khnang ban lait ka jingdheng kali.
Hadien lai sngi ba la kut ka tamasa cherry Blossom, u nonglum khubor u la ïoh ban hiar biang sha madan ka shnong Lumdaitkhla ha kaba la ïohi ba ki nongtrei ki la sdang ban pynpra ïa ki rynsan ba rwai, ki jaka ker bad la ïohi ba ki kynthei bad shynrang ki la bunkam ban pynkhuid ïa ki jaboh ba la bret da ki paidbah.
Haba ïoh ban ïakren bad uwei uba wan pynkhuid, u la ïathuh ba ki don kumba 15 ngut kiba ïoh bylla ban pynkhuid ïa ka madan ka ban shim por shi taïew haduh ban pyndep lut baroh.
U la ïathuh ba ha ka por ba wan rwai u Akon u la ïohi na jngai namar ka jingbun briew. Shuh shuh u la ïathuh ba na kane ka tamasa cherry blossom ki don palat 80 ngut kiba ïoh bylla naduh basdang haduh ba kut.
